شىمكەنتتە World Cleanup Day حالىقارالىق كۇنىنە جانە رەسپۋبليكالىق «تازا قازاقستان» باستاماسىنا وراي اۋقىمدى جالپىقالالىق سەنبىلىك ءوتتى.
قالا تۇرعىندارى، ۆولونتەرلەر، جاستار، مەملەكەتتىك ورگانداردىڭ، قوعامدىق ۇيىمداردىڭ وكىلدەرى جالپى 43 مىڭنان استام تۇرعىن بىرىگىپ، قالامىز بەن تابيعي اۋماقتاردى تازا ۇستاۋدا بەلسەندىلىك تانىتتى.
دەمالىس كۇنىنىڭ تاڭى استانا الاڭىندا مىڭعا جۋىق مەكتەپ وقۋشىسىن، ستۋدەنتتەردى، جوعارى وقۋ ورىندارىنىڭ وكىلدەرى مەن ۆولونتەرلىك ۇيىمداردىڭ مۇشەلەرىن بىرىكتىرگەن جاستار جيىنىمەن باستالدى.
سەنبىلىك باستالار الدىندا قاتىسۋشىلارعا قورشاعان ورتانى قورعاۋ، اۋلالاردا، كوشەلەردە جانە قوعامدىق ورىنداردا تازالىق ساقتاۋ قالا تۇرعىندارىنىڭ ەكولوگيالىق مادەنيەتىن قالىپتاستىراتىنى ايتىلدى.
قالا اكىمدىگىنىڭ مالىمەتىنشە، جينالعان مىڭ ۆولونتەر قالاداعى بەس اۋدان بويىنشا توپتارعا ءبولىندى. ونىڭ ىشىندە، 200-گە جۋىق ادام قالالىق دەندروساياباقتا تازالىق جۇمىستارىن جۇرگىزسە، قالعاندارى كوشەلەردە، ساياباقتاردا جانە اۋلالاردا جۇمىس ىستەدى.
ا.اسقاروۆ اتىنداعى دەندرولوگيالىق ساياباقتا ۇيىمداستىرىلعان تازالىق ءىس-شاراسىندا كوپشىلىك اۋماقتا سانيتارلىق تازالىق جۇمىستارىن جۇرگىزىپ، اعاش جاپىراقتارىن، قوقىس جيناۋعا اتسالىستى.
قالا اكىمى عابيت سىزدىقبەكوۆ كوپشىلىككە قورشاعان ورتانى، ءوز اۋلامىزدى تازا ۇستاۋدىڭ ماڭىزدى ەكەنىن اتاپ ءوتتى. تابيعي ورتانى ساقتاۋ جانە قورشاعان ورتانى بايىتۋعا دا ەرەكشە كوڭىل ءبولىندى. قالا اكىمى اكتسياعا قاتىسۋشىلارمەن بىرگە دەندرولوگيالىق ساياباققا 25 قىرعاۋىلدى ۇشىرۋ، 10 ءتيىن مەن سۋ ايدىنىنا 150 كەلى بالىقتى جىبەرۋ ءىس-شاراسىنا كۋا بولدى.
جالپى، بۇل كۇنى قالا بويىنشا 270 توننادان استام تۇرمىستىق جانە باسقا دا قالدىق شىعارىلدى. سونىمەن قاتار يرريگاتسيالىق ارىقتار تازالانىپ، كوشەلەر جۋىلدى.
سونداي-اق، كەشە قالاداعى مەشىت اۋماقتارىندا دا تازالىق جۇمىستارى جۇرگىزىلدى. ءىس-شاراعا مەشىت جاماعاتى بەلسەندى قاتىسىپ، عيمارات اينالاسىن قوقىستان تازارتىپ، اۋماقتى رەتكە كەلتىردى.
جالپى، «تازا قازاقستان» اكتسياسى اياسىنداعى جۇمىستار قورشاعان ورتانى تازا ۇستاۋمەن قاتار، تۇرعىنداردى ورتاق ىسكە جۇمىلدىرىپ، تازالىق مادەنيەتىن قالىپتاستىرۋعا باعىتتالىپ وتىر.
