Şymkentte World Cleanup Day halyqaralyq künıne jäne respublikalyq «Taza Qazaqstan» bastamasyna orai auqymdy jalpyqalalyq senbılık öttı.
Qala tūrǧyndary, volonterler, jastar, memlekettık organdardyŋ, qoǧamdyq ūiymdardyŋ ökılderı jalpy 43 myŋnan astam tūrǧyn bırıgıp, qalamyz ben tabiǧi aumaqtardy taza ūstauda belsendılık tanytty.
Demalys künınıŋ taŋy Astana alaŋynda myŋǧa juyq mektep oquşysyn, studentterdı, joǧary oqu oryndarynyŋ ökılderı men volonterlık ūiymdardyŋ müşelerın bırıktırgen jastar jiynymen bastaldy.
Senbılık bastalar aldynda qatysuşylarǧa qorşaǧan ortany qorǧau, aulalarda, köşelerde jäne qoǧamdyq oryndarda tazalyq saqtau qala tūrǧyndarynyŋ ekologiialyq mädenietın qalyptastyratyny aityldy.
Qala äkımdıgınıŋ mälımetınşe, jinalǧan myŋ volonter qaladaǧy bes audan boiynşa toptarǧa bölındı. Onyŋ ışınde, 200-ge juyq adam qalalyq dendrosaiabaqta tazalyq jūmystaryn jürgızse, qalǧandary köşelerde, saiabaqtarda jäne aulalarda jūmys ıstedı.
A.Asqarov atyndaǧy dendrologiialyq saiabaqta ūiymdastyrylǧan tazalyq ıs-şarasynda köpşılık aumaqta sanitarlyq tazalyq jūmystaryn jürgızıp, aǧaş japyraqtaryn, qoqys jinauǧa atsalysty.
Qala äkımı Ǧabit Syzdyqbekov köpşılıkke qorşaǧan ortany, öz aulamyzdy taza ūstaudyŋ maŋyzdy ekenın atap öttı. Tabiǧi ortany saqtau jäne qorşaǧan ortany baiytuǧa da erekşe köŋıl bölındı. Qala äkımı aksiiaǧa qatysuşylarmen bırge dendrologiialyq saiabaqqa 25 qyrǧauyldy ūşyru, 10 tiın men su aidynyna 150 kelı balyqty jıberu ıs-şarasyna kuä boldy.
Jalpy, būl künı qala boiynşa 270 tonnadan astam tūrmystyq jäne basqa da qaldyq şyǧaryldy. Sonymen qatar irrigasiialyq aryqtar tazalanyp, köşeler juyldy.
Sondai-aq, keşe qaladaǧy meşıt aumaqtarynda da tazalyq jūmystary jürgızıldı. Is-şaraǧa meşıt jamaǧaty belsendı qatysyp, ǧimarat ainalasyn qoqystan tazartyp, aumaqty retke keltırdı.
Jalpy, «Taza Qazaqstan» aksiiasy aiasyndaǧy jūmystar qorşaǧan ortany taza ūstaumen qatar, tūrǧyndardy ortaq ıske jūmyldyryp, tazalyq mädenietın qalyptastyruǧa baǧyttalyp otyr.
