Jaŋa nysandar Abai atyndaǧy saiabaqta, Metallurgter saiabaǧynda jäne 17-şaǧynaudandaǧy jaiau jürgınşıler alleiasynda ornalasqan.
Aşylu saltanatyna qala äkımı Ǧabit Syzdyqbekov, Halyqaralyq şahmat federasiiasynyŋ (FIDE) jäne Qazaqstan şahmat federasiiasynyŋ (KazChess) prezidentı Timur Turlov qatysty. 
Qala äkımı jaŋa şahmat üilerınıŋ aşyluy tūrǧyndardyŋ bos uaqytyn tiımdı ūiymdastyruǧa, balalar men jastardyŋ oi-örısın keŋeituge baǧyttalǧan maŋyzdy qadam ekenın atap öttı.
«Qalamyzda şahmatqa degen qyzyǧuşylyqtyŋ jyl saiyn artyp kele jatqany quantady. 2024 jyly Ortalyq saiabaqta ardagerler men aǧa buyn ökılderıne arnalǧan Şahmat üiı aşylǧan bolatyn. Bügınde būl igı bastama jalǧasuda. Jaŋa nysandar tūrǧyndarǧa bas qosuǧa, şahmatpen tūraqty ainalysuǧa jäne bos uaqytyn paidaly ötkızuge mümkındık beredı. Aldaǧy uaqytta da būqaralyq sportty damytuǧa jäne daryndy sportşylardy qoldauǧa erekşe köŋıl bölemız», – dedı Ǧabit Syzdyqbekov.
Aita keteiık, eŋ ülken şahmat üiı Abai atyndaǧy saiabaqta ornalasqan, onyŋ aumaǧy – 223 şarşy metr. Qalǧan ekı pavilonnyŋ ärqaisysynyŋ audany 81 şarşy metrdı qūraidy. Olardyŋ bırınde jazǧy terrasa qarastyrylǧan. Barlyq nysan arnaiy şahmat üstelderımen jabdyqtalǧan.
FIDE jäne KazChess prezidentı Timur Turlov şahmat infraqūrylymynyŋ qoljetımdı boluy bolaşaq chempiondardy daiarlau jäne şahmat qozǧalysyn odan ärı damytuda maŋyzdy ekenın atap öttı.
«Şymkent turnirler sany men daryndy oiynşylardyŋ, äsırese balalar men jastardyŋ ülesı boiynşa köşbasşy qalalardyŋ qataryna senımdı türde enıp keledı. Degenmen, chempiondar özdıgınen qalyptaspaidy. Ülken sport būqaralyq qyzyǧuşylyq pen oiynǧa degen süiıspenşılıkten bastalady. Sondyqtan bırden üş şahmat üiınıŋ aşyluyn maŋyzdy qadam dep sanaimyn. Būl nysandar qalanyŋ qoǧamdyq ömırınıŋ ajyramas bölıgıne ainalyp, Şymkenttıŋ Qazaqstan men Ortalyq Aziiadaǧy jetekşı şahmat ortalyqtarynyŋ bırı retındegı ornyn nyǧaita tüsetınıne senımdımın», – dedı Timur Turlov. 
Nysandardyŋ qūrylysyn Freedom Holding Corp. kompaniiasy «Freedom Şapaǧat» korporativtık qory arqyly qarjylandyrdy. Qūrylys jūmysyn «Orda-Stroi Kapital» JŞS atqarǧan nysandar paidalanuǧa berılgennen keiın Freedom Telecom olardy internet jelısıne qosudy josparlap otyr.
Jaŋa şahmat üilerınıŋ aşyluy Şymkentte osy sport türın damytuǧa baǧyttalǧan köp jyldyq jūmystyŋ jalǧasy boldy.
Megapolistıŋ bai şahmat tarihy bar. Tamara Klink, Läzzat Täjieva, Gülıshan Nahbaeva jäne Rinat Jūmabaev sekıldı tanymal sportşylardyŋ esımderı qalanyŋ atymen tyǧyz bailanysty. Şymkent şahmat mektebınıŋ ökılderı bırneşe ret el chempiondary atanyp, halyqaralyq jarystarda öner körsettı.
Bügınde būl dästürler balalar sportyn damytu jäne ırı jarystar ötkızu arqyly jalǧasyn tauyp keledı. Şymkentte ırı halyqaralyq jarystar da ötkızıledı. 2024 jyly FIDE äielder arasyndaǧy Gran-pri kezeŋı ūiymdastyrylsa, 2026 jyldyŋ nauryzynda jülde qory 25 mln teŋgenı qūraityn KazChess Masters Nauryz halyqaralyq turnirı öttı.
Şahmattyq bılım beru salasy da damyp keledı. Tamyz aiynda 48 jergılıktı pedagog «Bılım berudegı şahmat» baǧdarlamasy boiynşa oqudan öttı.
Osylaişa üş şahmat üiınıŋ aşyluy Şymkentte ziiatkerlık sportty damytu baǧytyndaǧy jūmystyŋ jalǧasyna ainaldy. Jaŋa alaŋdar şahmatpen ainalysu mümkındıgın keŋeitıp, äuesqoi oiynşylar men täjıribelı sportşylardyŋ basyn qosady jäne osy sportqa qyzyǧuşylyq tanytatyn qala tūrǧyndarynyŋ sanyn arttyruǧa yqpal etedı.
