جاڭا نىساندار اباي اتىنداعى ساياباقتا، مەتاللۋرگتەر ساياباعىندا جانە 17-شاعىناۋدانداعى جاياۋ جۇرگىنشىلەر اللەياسىندا ورنالاسقان.
اشىلۋ سالتاناتىنا قالا اكىمى عابيت سىزدىقبەكوۆ، حالىقارالىق شاحمات فەدەراتسياسىنىڭ (FIDE) جانە قازاقستان شاحمات فەدەراتسياسىنىڭ (KazChess) پرەزيدەنتى تيمۋر تۋرلوۆ قاتىستى. 
قالا اكىمى جاڭا شاحمات ۇيلەرىنىڭ اشىلۋى تۇرعىنداردىڭ بوس ۋاقىتىن ءتيىمدى ۇيىمداستىرۋعا، بالالار مەن جاستاردىڭ وي-ءورىسىن كەڭەيتۋگە باعىتتالعان ماڭىزدى قادام ەكەنىن اتاپ ءوتتى.
«قالامىزدا شاحماتقا دەگەن قىزىعۋشىلىقتىڭ جىل سايىن ارتىپ كەلە جاتقانى قۋانتادى. 2024 جىلى ورتالىق ساياباقتا ارداگەرلەر مەن اعا بۋىن وكىلدەرىنە ارنالعان شاحمات ءۇيى اشىلعان بولاتىن. بۇگىندە بۇل يگى باستاما جالعاسۋدا. جاڭا نىساندار تۇرعىندارعا باس قوسۋعا، شاحماتپەن تۇراقتى اينالىسۋعا جانە بوس ۋاقىتىن پايدالى وتكىزۋگە مۇمكىندىك بەرەدى. الداعى ۋاقىتتا دا بۇقارالىق سپورتتى دامىتۋعا جانە دارىندى سپورتشىلاردى قولداۋعا ەرەكشە كوڭىل بولەمىز»، – دەدى عابيت سىزدىقبەكوۆ.
ايتا كەتەيىك، ەڭ ۇلكەن شاحمات ءۇيى اباي اتىنداعى ساياباقتا ورنالاسقان، ونىڭ اۋماعى – 223 شارشى مەتر. قالعان ەكى پاۆيلوننىڭ ارقايسىسىنىڭ اۋدانى 81 شارشى مەتردى قۇرايدى. ولاردىڭ بىرىندە جازعى تەرراسا قاراستىرىلعان. بارلىق نىسان ارنايى شاحمات ۇستەلدەرىمەن جابدىقتالعان.
FIDE جانە KazChess پرەزيدەنتى تيمۋر تۋرلوۆ شاحمات ينفراقۇرىلىمىنىڭ قولجەتىمدى بولۋى بولاشاق چەمپيونداردى دايارلاۋ جانە شاحمات قوزعالىسىن ودان ءارى دامىتۋدا ماڭىزدى ەكەنىن اتاپ ءوتتى.
«شىمكەنت تۋرنيرلەر سانى مەن دارىندى ويىنشىلاردىڭ، اسىرەسە بالالار مەن جاستاردىڭ ۇلەسى بويىنشا كوشباسشى قالالاردىڭ قاتارىنا سەنىمدى تۇردە ەنىپ كەلەدى. دەگەنمەن، چەمپيوندار وزدىگىنەن قالىپتاسپايدى. ۇلكەن سپورت بۇقارالىق قىزىعۋشىلىق پەن ويىنعا دەگەن سۇيىسپەنشىلىكتەن باستالادى. سوندىقتان بىردەن ءۇش شاحمات ءۇيىنىڭ اشىلۋىن ماڭىزدى قادام دەپ سانايمىن. بۇل نىساندار قالانىڭ قوعامدىق ءومىرىنىڭ اجىراماس بولىگىنە اينالىپ، شىمكەنتتىڭ قازاقستان مەن ورتالىق ازياداعى جەتەكشى شاحمات ورتالىقتارىنىڭ ءبىرى رەتىندەگى ورنىن نىعايتا تۇسەتىنىنە سەنىمدىمىن»، – دەدى تيمۋر تۋرلوۆ. 
نىسانداردىڭ قۇرىلىسىن Freedom Holding Corp. كومپانياسى «Freedom شاپاعات» كورپوراتيۆتىك قورى ارقىلى قارجىلاندىردى. قۇرىلىس جۇمىسىن «وردا-ستروي كاپيتال» جشس اتقارعان نىساندار پايدالانۋعا بەرىلگەننەن كەيىن Freedom Telecom ولاردى ينتەرنەت جەلىسىنە قوسۋدى جوسپارلاپ وتىر.
جاڭا شاحمات ۇيلەرىنىڭ اشىلۋى شىمكەنتتە وسى سپورت ءتۇرىن دامىتۋعا باعىتتالعان كوپ جىلدىق جۇمىستىڭ جالعاسى بولدى.
مەگاپوليستىڭ باي شاحمات تاريحى بار. تامارا كلينك، ءلاززات تاجيەۆا، گۇلىسحان ناحباەۆا جانە رينات جۇماباەۆ سەكىلدى تانىمال سپورتشىلاردىڭ ەسىمدەرى قالانىڭ اتىمەن تىعىز بايلانىستى. شىمكەنت شاحمات مەكتەبىنىڭ وكىلدەرى بىرنەشە رەت ەل چەمپيوندارى اتانىپ، حالىقارالىق جارىستاردا ونەر كورسەتتى.
بۇگىندە بۇل داستۇرلەر بالالار سپورتىن دامىتۋ جانە ءىرى جارىستار وتكىزۋ ارقىلى جالعاسىن تاۋىپ كەلەدى. شىمكەنتتە ءىرى حالىقارالىق جارىستار دا وتكىزىلەدى. 2024 جىلى FIDE ايەلدەر اراسىنداعى گران-پري كەزەڭى ۇيىمداستىرىلسا، 2026 جىلدىڭ ناۋرىزىندا جۇلدە قورى 25 ملن تەڭگەنى قۇرايتىن KazChess Masters Nauryz حالىقارالىق ءتۋرنيرى ءوتتى.
شاحماتتىق ءبىلىم بەرۋ سالاسى دا دامىپ كەلەدى. تامىز ايىندا 48 جەرگىلىكتى پەداگوگ ء«بىلىم بەرۋدەگى شاحمات» باعدارلاماسى بويىنشا وقۋدان ءوتتى.
وسىلايشا ءۇش شاحمات ءۇيىنىڭ اشىلۋى شىمكەنتتە زياتكەرلىك سپورتتى دامىتۋ باعىتىنداعى جۇمىستىڭ جالعاسىنا اينالدى. جاڭا الاڭدار شاحماتپەن اينالىسۋ مۇمكىندىگىن كەڭەيتىپ، اۋەسقوي ويىنشىلار مەن تاجىريبەلى سپورتشىلاردىڭ باسىن قوسادى جانە وسى سپورتقا قىزىعۋشىلىق تانىتاتىن قالا تۇرعىندارىنىڭ سانىن ارتتىرۋعا ىقپال ەتەدى.
