شىمكەنتتە رەسپۋبليكا كۇنىنە وراي 100 مەترلىك تۋ تۇعىرىنا مەملەكەتتىك تۋدى كوتەرۋ ءراسىمى ءوتتى. سالتاناتتى ءىس-شاراعا قالا اكىمى عابيت سىزدىقبەكوۆ، قالا تۇرعىندارى مەن قوعام وكىلدەرى جانە جاستار قاتىستى.
سالتاناتتى ءراسىم مەملەكەتتىك رامىزدەرگە دەگەن قۇرمەتتىڭ كورىنىسىنە اينالىپ، ەل تاريحىنداعى ەگەمەندىكتىڭ ماڭىزىن تاعى ءبىر رەت ايشىقتادى. مەملەكەتتىك تۋ – قازاقستاننىڭ تاۋەلسىزدىگىنىڭ، حالىقتىڭ بىرلىگىنىڭ جانە مەملەكەت بولاشاعى ءۇشىن ورتاق جاۋاپكەرشىلىكتىڭ سيمۆولى.
بيىل قازاق ەلىنىڭ مەملەكەتتىك ەگەمەندىگى تۋرالى دەكلاراتسيانىڭ قابىلدانعانىنا 36 جىل تولىپ وتىر. 1990 جىلعى 25 قازاندا قابىلدانعان بۇل تاريحي قۇجات ەل تاۋەلسىزدىگىنە باستار جولداعى ماڭىزدى كەزەڭگە اينالىپ، قازاقستان مەملەكەتتىلىگىنىڭ قالىپتاسۋىنا نەگىز قالادى.
بۇگىندە رەسپۋبليكا كۇنى ازاماتتاردى ورتاق قۇندىلىقتار، تاريحقا قۇرمەت جانە وتاننىڭ وركەندەۋىنە دەگەن ۇمتىلىس توڭىرەگىندە بىرىكتىرەدى. بۇل مەرەكە ەل بىرلىگى مەن قوعامدىق كەلىسىمدى ساقتاۋدىڭ، سونداي-اق، مەملەكەتتىڭ دامۋىنا ءار ازاماتتىڭ ۇلەس قوسۋىنىڭ ماڭىزىن ەسكە سالادى.
