شىمكەنت قالاسىنداعى بايدىبەك بي داڭعىلى مەن تولەمەتوۆ كوشەسىنىڭ قيىلىسىندا جاڭا جول-كولىك ايىرىعى اشىلدى. اشىلۋ سالتاناتىنا قالا اكىمى عابيت سىزدىقبەكوۆ قاتىستى.
ەسكە سالا كەتەيىك، نىساننىڭ قۇرىلىسى وتكەن جىلدىڭ سوڭىندا مەملەكەت باسشىسىنىڭ مەگاپوليستىڭ كولىك ينفراقۇرىلىمىن دامىتۋ جونىندەگى تاپسىرماسىن ورىنداۋ اياسىندا باستالعان بولاتىن.
بۇگىن ەستاكادا ارقىلى كولىك قوزعالىسى ىسكە قوسىلدى. قازىرگى تاڭدا مۇندا نەگىزگى قۇرىلىس اياقتالىپ، جول بەلگىلەرى مەن تاڭبالارى سالىندى. ەستاكادانىڭ اشىلۋى قالانىڭ كولىك قوزعالىسى تىعىز ۋچاسكەلەرىنىڭ بىرىندە جول قوزعالىسىن رەتتەۋگە باعىتتالعان جوبانى ىسكە اسىرۋداعى ماڭىزدى كەزەڭ بولدى.
قالا اكىمى جول ينفراقۇرىلىمىن دامىتۋ شىمكەنتتىڭ قاجەتتىلىگىنە ساي جۇرگىزىلۋى ءتيىس ەكەنىن اتاپ ءوتتى. زاماناۋي كولىك شەشىمدەرى كەپتەلىستەردى ازايتۋعا، تۇرعىنداردىڭ قاتىناۋىن جەڭىلدەتۋگە جانە قالا اۋداندارى اراسىنداعى بايلانىستى جاقسارتۋعا باعىتتالعان.
قازىرگى ۋاقىتتا جولايىرىقتىڭ تومەنگى دەڭگەيىندە اينالما قوزعالىستى جانە وڭ جاق وتكەل تارماقتارىن، سونداي-اق، جەراستى جاياۋ جۇرگىنشىلەر وتكەلدەرىن اباتتاندىرۋ جۇمىسى جالعاسۋدا.
ىرگەلەس اۋماقتى اباتتاندىرۋدى قوسا العاندا بارلىق جۇمىستى جىلدىڭ سوڭىنا دەيىن اياقتاۋ جوسپارلانىپ وتىر. جوبانىڭ جۇزەگە اسىرىلۋى وسى ۋچاسكەدەگى جول قوزعالىسىن جەتىلدىرۋگە، جۇرگىزۋشىلەر مەن جاياۋ جۇرگىنشىلەر ءۇشىن قولايلى جاعداي جاساۋعا مۇمكىندىك بەرەدى.
