شىمكەنتتە ءبىلىم بەرۋ رەسۋرستارىن ءتيىمدى پايدالانۋ، قارجىلىق ءتارتىپتى جەتىلدىرۋ جانە تسيفرلىق باقىلاۋ تەتىكتەرىن دامىتۋ ماسەلەلەرى تالقىلاندى.
15 قازاندا باستالعان وڭىرارالىق تاجىريبەلىك سەمينار-كەڭەس قوسىمشا ءبىلىم بەرۋگە ارنالعان بىرىڭعاي مەملەكەتتىك تاپسىرىستى ىسكە اسىرۋ تاجىريبەسىن تاراتۋعا ارنالدى. جيىن قازاقستان رەسپۋبليكاسى وقۋ-اعارتۋ مينيسترلىگىنىڭ باستاماسىمەن ۇيىمداستىرىلدى.
سەمينارعا ورتالىق مەملەكەتتىك ورگانداردىڭ، «قازاقتەلەكوم» اق مەن «قارجى ورتالىعى» اق-نىڭ وكىلدەرى، ەلىمىزدىڭ 11 وڭىرىنەن اكىم ورىنباسارلارى، سونداي-اق ءبىلىم بەرۋ، ەكونوميكا، تسيفرلاندىرۋ، سپورت جانە مادەنيەت سالالارىنىڭ باسشىلارى مەن ماماندارى قاتىستى. كەزدەسۋدە بيۋدجەت قاراجاتىن ۇتىمدى پايدالانۋ، ءبىلىم بەرۋ قىزمەتتەرىنىڭ قولجەتىمدىلىگىن ارتتىرۋ جانە مەملەكەتتىك تاپسىرىستى باقىلاۋ ماسەلەلەرى قارالدى.
شىمكەنت قالاسى اكىمىنىڭ ورىنباسارى سارسەن قۇرانبەك ءبىلىم بەرۋ جۇيەسىن دامىتۋدا قولدا بار رەسۋرستاردى ءتيىمدى باسقارۋدىڭ ماڭىزىنا توقتالدى. ونىڭ ايتۋىنشا، سالانىڭ تۇراقتى دامۋى ءۇشىن قارجىلاندىرۋ كولەمىمەن قاتار، قاراجاتتىڭ ماقساتتى جۇمسالۋى مەن باسقارۋشىلىق شەشىمدەردىڭ ناتيجەلىلىگىنە دە باسىمدىق بەرىلۋى كەرەك.
– ءبىلىم بەرۋ جۇيەسىن دامىتۋدا ەڭ الدىمەن قولدا بار مۇمكىندىكتەردى دۇرىس باعالاپ، رەسۋرستاردى ناقتى قاجەتتىلىككە قاراي باعىتتاۋ ماڭىزدى. بۇل رەتتە قارجىلىق ءتارتىپتى كۇشەيتىپ قانا قويماي، جوسپارلاۋ مەن باقىلاۋ جۇمىستارىن جەتىلدىرۋ قاجەت. ءاربىر باسقارۋشىلىق شەشىم ناقتى ناتيجەگە نەگىزدەلىپ، بالالاردىڭ ساپالى ءارى قولجەتىمدى ءبىلىم الۋىنا ىقپال ەتۋى ءتيىس، – دەدى سارسەن ابايۇلى.
قالادا ءبىلىم بەرۋ سالاسىن جەتىلدىرۋدىڭ نەگىزگى باعىتتارىنىڭ ءبىرى – رەسۋرستار تاپشىلىعى جاعدايىندا قولدانىستاعى ينفراقۇرىلىمنىڭ مۇمكىندىگىن بارىنشا ءتيىمدى پايدالانۋ. بۇل رەتتە ءبىلىم بەرۋ ۇيىمدارىنىڭ قاجەتتىلىكتەرىن جۇيەلى باعالاۋ، قارجىلاندىرۋدى جوسپارلاۋ جانە بولىنگەن قاراجاتتىڭ ناتيجەسىن باقىلاۋ وزەكتى بولىپ وتىر. نىسانالى ينديكاتورلارعا قول جەتكىزۋ ءۇشىن اتقارىلعان جۇمىستىڭ كولەمىن عانا ەمەس، ونىڭ ساپالىق كورسەتكىشتەرىن دە ەسكەرۋ قاجەت.
سەمينار بارىسىندا تسيفرلىق باقىلاۋ قۇرالدارىن ەنگىزۋ ماسەلەسى دە كەڭىنەن ءسوز بولدى. شىمكەنت قالاسىندا قوسىمشا ءبىلىم بەرۋگە ارنالعان بىرىڭعاي مەملەكەتتىك تاپسىرىستىڭ پيلوتتىق جوباسى اياسىندا بالالار تۋرالى قايتالاناتىن جازبالاردى جويۋ، قىزمەت كورسەتىلگەنىن راستاۋ جانە قارجىلاندىرۋدى ناقتى قىزمەت الۋشىمەن بايلانىستىرۋ تەتىكتەرى ەنگىزىلگەن. سونىمەن قاتار، مەملەكەتتىك مەكتەپتەردىڭ بوس قۋاتتارىن پايدالانۋ ارقىلى بالالاردى قوسىمشا بىلىممەن قامتۋدى كەڭەيتۋ جولدارى قاراستىرىلدى.
