شىمكەنتتە ءبىتىرۋشى سىنىپ وقۋشىلارىمەن كاسىبي باعدار بويىنشا كەزدەسۋ ءوتتى

228
Adyrna.kz Telegram
https://www.adyrna.kz/storage/uploads/CTNtZZouZZeWUAVw36uzFaMiTyA9flgGRDOyQc2B.jpg

شىمكەنت قالاسىنداعى «قىزعالداق» سارايىندا مەكتەپ ءبىتىرۋشى تۇلەكتەرگە ارنالعان ء«بىلىم. باعدار. بولاشاق» اتتى اقپاراتتىق-موتيۆاتسيالىق كەزدەسۋ ءوتتى.

مۇحتار اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنىڭ ۇيىمداستىرۋىمەن وتكەن شاراعا 2 150 وقۋشى قاتىستى. ونىڭ 500-ءى – «التىن بەلگى» يەگەرى مەن «ۇزدىك» اتتەستاتقا ۇمىتكەر تۇلەكتەر. قازاقستان رەسپۋبليكاسى تاۋەلسىزدىگىنىڭ 35 جىلدىعىنا وراي ۇيىمداستىرىلعان كەزدەسۋدىڭ نەگىزگى ماقساتى – جاس تۇلەكتەرگە ماماندىق تاڭداۋدا باعىت-باعدار بەرىپ، جوعارى ءبىلىم الۋ مۇمكىندىكتەرىن كەڭىنەن تانىستىرۋ. كەزدەسۋ اياسىندا ۋنيۆەرسيتەتتىڭ ءتۇرلى ءبىلىم بەرۋ باعدارلامالارى مەن ماماندىقتارى ۇسىنىلعان كورمە ۇيىمداستىرىلىپ، وقۋشىلار وقۋ ورنىنىڭ تىنىس-تىرشىلىگىمەن تانىستى.

ودان كەيىن كەزدەسۋدىڭ رەسمي بولىمىنە كەزەك بەرىلدى. سالتاناتتى جيىندى شىمكەنت قالاسى اكىمىنىڭ ورىنباسارى سارسەن قۇرانبەك اشىپ، ءبىتىرۋشى سىنىپ وقۋشىلارىنا الداعى سىناقتاردا ساتتىلىك تىلەپ، بولاشاقتارىنا سەنىم ءبىلدىردى.

– ماماندىق تاڭداۋدا قاتەلەسپەۋ كەرەك. كەز كەلگەن ماماندىقتى تاڭداي سالماي، ادامنىڭ ءوز قىزىعۋشىلىعى مەن قابىلەتىنە قاراي شەشىم قابىلداعانى دۇرىس. ويتكەنى ەڭ باستىسى – گرانتقا ءتۇسۋ ەمەس، تاڭداعان ماماندىعى بويىنشا ساپالى ءبىلىم الىپ، ەرتەڭ بىلىكتى مامان رەتىندە ەلگە قىزمەت ەتۋ، قوعامنىڭ دامۋىنا ءوز ۇلەسىن قوسۋ، – دەدى ول.

كەزدەسۋ بارىسىندا «Auezov Quiz» زياتكەرلىك سايىسىنىڭ قورىتىندىسى جاريالانىپ، ۇزدىك كوماندالارعا اقشالاي سەرتيفيكاتتار تابىستالدى. ءبىرىنشى ورىندى يەلەنگەن ت. تاجىباەۆ اتىنداعى №47 مەكتەپ-گيمنازياسىنىڭ «فارابي» كومانداسى 500 مىڭ تەڭگەنىڭ سەرتيفيكاتىمەن ماراپاتتالدى. ەكىنشى ورىنعا جايعاسقان ن. وڭداسىنوۆ اتىنداعى №38 مەكتەپ-گيمنازياسىنىڭ «سانا» كومانداسىنا 300 مىڭ تەڭگە، ال ءۇشىنشى ورىن العان ق. سىپاتاەۆ اتىنداعى №7 IT مەكتەپ-ليتسەيىنىڭ «الاۋ» جانە ا.س. پۋشكين اتىنداعى №1 مەكتەپ-گيمنازياسىنىڭ «Oxygen» كوماندالارىنا 100 مىڭ تەڭگەدەن سەرتيفيكات بەرىلدى.

جيىندا تۇلەكتەردى تولعاندىرعان نەگىزگى ماسەلەلەردىڭ ءبىرى – مەملەكەتتىك ءبىلىم گرانتتارىن يەلەنۋ جانە سۇرانىسقا يە ماماندىقتاردى دۇرىس تاڭداۋ بولدى. وسى باعىتتا قر عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلباەۆ جوعارى ءبىلىم بەرۋ جۇيەسىندەگى جاڭالىقتار مەن ۇلتتىق بىرىڭعاي تەستىلەۋدىڭ الداعى وزگەرىستەرى تۋرالى باياندادى. ونىڭ ايتۋىنشا، ەلىمىزدە جىل سايىن باكالاۆريات باعىتى بويىنشا 70 مىڭنان استام مەملەكەتتىك ءبىلىم گرانتى بولىنەدى. ونىڭ 60 پايىزىنان استامى ينجەنەرلىك-تەحنيكالىق باعىتتارعا تيەسىلى. بىلتىر پەداگوگيكالىق ماماندىقتارعا شامامەن 15 مىڭ، ال اقپاراتتىق تەحنولوگيالار سالاسىنا 11 مىڭعا جۋىق گرانت بولىنگەن.

سپيكەر تالاپكەرلەر اراسىندا حالىقارالىق قاتىناستار، قۇقىق، مەديتسينا جانە پەداگوگيكا باعىتتارىنا سۇرانىستىڭ جوعارى ەكەنىن اتاپ ءوتتى. سونىمەن قاتار ماماندىقتى تەك گرانتقا ءتۇسۋ مۇمكىندىگىنە قاراپ تاڭداۋدىڭ دۇرىس ەمەستىگىن جەتكىزدى.

– كوپ جاعدايدا وقۋشىلار گرانتتى عانا ويلايدى. باستىسى – گرانتقا تۇسسەم دەيدى. ال كەيىن سول ماماندىقتى وقي الا ما، جوق پا دەگەن ماسەلە ەكىنشى ورىنعا قالىپ جاتادى. سوندىقتان تالاپكەرلەر ەڭ الدىمەن ءوز قىزىعۋشىلىعى مەن قابىلەتىنە ساي ماماندىق تاڭداۋى كەرەك. تاعى ءبىر ايتا كەتەتىن جاڭالىق 2027 جىلى تەستىلەۋدىڭ قازىرگى فورماتى وزگەرىسسىز قالادى. ال جاڭا فورمات 2027 جىلى پيلوتتىق جوبا رەتىندە ەنگىزىلىپ، جوسپار بويىنشا 2029 جىلى جالپىۇلتتىق دەڭگەيدە قولدانىسقا ەنگىزىلۋى مۇمكىن، –دەدى ر.ەمەلباەۆ.

ال مۇحتار اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنىڭ رەكتورى مۇحتار تولەگەن جيىننىڭ تۇلەكتەر ءۇشىن ماڭىزدىلىعىنا توقتالىپ، وقۋ ورنىنىڭ مۇمكىندىكتەرى مەن جاڭالىقتارىن تانىستىردى. ونىڭ سوزىنشە، بيىل شىمكەنت قالاسىندا 17 645 وقۋشى مەكتەپ بىتىرەدى. ۋنيۆەرسيتەت تالاپكەرلەرگە جان-جاقتى قولداۋ كورسەتىپ، ءبىلىمدى جاستاردى ىنتالاندىرۋدى كوزدەيدى.

– ءبىزدىڭ ۋنيۆەرسيتەتتە ءبىلىم بەرۋ باعىتتارى وتە كەڭ. مۇندا گۋمانيتارلىق عىلىمداردان باستاپ، ادەبيەت پەن مادەنيەت، حيميا، تەحنولوگيا، قۇقىق، ينجەنەريا جانە باسقا دا كوپتەگەن سالا بويىنشا ءبىلىم الۋعا مۇمكىندىك بار. ياعني، تالاپكەرلەر ءوز قىزىعۋشىلىعى مەن تاڭداعان باعىتىنا سايكەس ماماندىق تابا الادى. سونىمەن قاتار بيىلعى جىلدىڭ باستى جاڭالىقتارىنىڭ ءبىرى – ۋنيۆەرسيتەت تاراپىنان تالاپكەرلەرگە ارناپ 300 ءبىلىم گرانتىن ءبولۋ جوسپارلانىپ وتىر. بۇل – جوعارى ءبىلىم الۋعا ۇمتىلعان جاستارعا جاسالىپ وتىرعان ۇلكەن مۇمكىندىك. ءبىزدىڭ ماقساتىمىز – ءبىلىمدى، ىزدەنىمپاز جاستاردى قولداپ، ولاردىڭ ساپالى ءبىلىم الىپ، بولاشاقتا بىلىكتى مامان بولىپ قالىپتاسۋىنا جاعداي جاساۋ، – دەدى ۋنيۆەرسيتەت رەكتورى مۇحتار تولەگەن.

كەزدەسۋ ودان ءارى ۋنيۆەرسيتەتتىڭ شىعارماشىلىق ۇجىمدارىنىڭ ونەرىمەن جالعاستى. «قاراگوز» بي ءانسامبلى اسەم بيىمەن كورەرمەندەرگە ەرەكشە اسەر سىيلاسا، «مادمۋازەل» جايدارمان كومانداسى ازىلگە تولى قويىلىمىمەن كوپشىلىكتىڭ كوڭىلىن كوتەردى.

پىكىرلەر