شىمكەنت قالاسىنىڭ قايناربۇلاق جانە ءنۇرسات شاعىناۋداندارىندا انگار ۇلگىسىندەگى ەكى ءمودۋلدى سپورت زالىنىڭ قۇرىلىسى اياقتالدى. جاڭا نىساندار بۇقارالىق سپورتپەن شۇعىلدانۋعا مۇمكىندىك بەرىپ، اسىرەسە بالالار مەن جاسوسپىرىمدەردىڭ سپورتقا قىزىعۋشىلىعىن ارتتىرۋعا باعىتتالعان.
نىسانداردىڭ اشىلۋ سالتاناتىنا قالا اكىمى عابيت سىزدىقبەكوۆ جانە «قازاقستان حالقىنا» قوعامدىق قورى باسقارماسىنىڭ ءتورايىمى ءلاززات شىڭعىسباەۆا قاتىستى.
ء«ار شاعىناۋداننىڭ تۇرعىندارى تۇراقتى جاتتىعىپ، دەنساۋلىعىن نىعايتۋعا، بەلسەندى ءومىر سالتىن ۇستانۋعا مۇمكىندىك الۋى ماڭىزدى. ءبىز سپورت نىساندارىنىڭ قولجەتىمدىلىگىنە ەرەكشە نازار اۋدارا وتىرىپ، قالانىڭ سپورت ينفراقۇرىلىمىن دامىتۋدى جالعاستىرامىز»، – دەدى عابيت سىزدىقبەكوۆ.
ايتا كەتەيىك، ءمودۋلدى نىسانداردىڭ قۇرىلىسى 2025 جىلدىڭ قاراشا ايىندا باستالعان. جوبالار «قازاقستان حالقىنا» قوعامدىق قورىنىڭ قولداۋىمەن جۇزەگە اسىرىلىپ، مەگاپوليسكە سىيلىق رەتىندە بەرىلىپ وتىر.
سپورت زالدارى باسكەتبول، ۆولەيبول جانە شاعىن فۋتبول ويناۋعا قاجەت قۇرال-جابدىقتارمەن قامتىلعان. مۇندا ۇلدار مەن قىزدارعا ارنالعان كيىم اۋىستىرۋ بولمەلەرى، دۋش كابينالارى، جاتتىقتىرۋشىلارعا ارنالعان بولمەلەر جانە 50 كورەرمەنگە ارنالعان ورىندار قاراستىرىلعان. سونداي-اق، كۇن سالقىن مەزگىلدە جاتتىعۋعا قولايلى بولۋى ءۇشىن جىلىتۋ جۇيەلەرى ورناتىلعان.
وسىلايشا جاڭا سپورت نىساندارى تۇرعىندارعا ۇيىنە جاقىن جەردە دەنە شىنىقتىرۋمەن اينالىسۋعا مۇمكىندىك بەرەدى. بۇل بۇقارالىق سپورتتى كەڭىنەن ناسيحاتتاۋعا جانە سالاۋاتتى ءومىر سالتىن قالىپتاستىرۋعا ىقپال ەتەدى.
