شىمكەنتتە قايرات نۇرتاس كونتسەرتى كەزىندەگى ادامداردىڭ جاپپاي قىسىلۋىنا بايلانىستى ۇستالعان ۇيىمداستىرۋشى ەكى اي مەرزىمگە ۇيقاماققا الىندى، دەپ حابارلايدى "ادىرنا" ۇلتتىق پورتالى.
قالا پروكۋراتۋراسى تەرگەۋ سوتىنىڭ شەشىمىمەن كەلىسپەي، وعان نارازىلىق بىلدىرمەك. بۇعان دەيىن كۇدىكتى ۇستالىپ، ۋاقىتشا ۇستاۋ يزولياتورىنا قامالعان. الايدا تەرگەۋ سوتى ونى قاماۋدا ۇستاۋعا سانكتسيا بەرمەي، ەكى ايعا ۇيقاماققا جىبەرۋ تۋرالى شەشىم قابىلداعان.
پروكۋراتۋرا سوت قاۋلىسىنا نارازىلىق ەنگىزەتىنىن ايتتى.
قايرات نۇرتاس كونتسەرتى 10 قازاندا شىمكەنتتەگى ق.مۇڭايتپاسوۆ اتىنداعى ستاديوندا وتكەن. كونتسەرتكە جينالعان كورەرمەندەر كىرەبەرىستە قىسىلىپ، وقيعا بەينەلەنگەن ۆيدەولار الەۋمەتتىك جەلىلەردە تاراعان. الدىن الا مالىمەت بويىنشا، ۇيىمداستىرۋشىلار ستاديوننىڭ سىيىمدىلىعىنان كوپ بيلەت ساتقان بولۋى مۇمكىن. وسىعان بايلانىستى ادامداردىڭ قاۋىپسىزدىگىنە قاتەر تونگەن.
قازىر بۇل دەرەك بويىنشا قازاقستان قىلمىستىق كودەكسىنىڭ 306-بابىنىڭ 2-بولىگى، ياعني قاۋىپسىزدىك تالاپتارىنا ساي كەلمەيتىن قىزمەت كورسەتۋ فاكتىسى بويىنشا تەرگەۋ جۇرگىزىلىپ جاتىر. ادامداردىڭ قىسىلۋى سالدارىنان 18 جاستاعى قىز جاراقات الىپ، اۋرۋحاناعا جەتكىزىلگەن. شىمكەنت قالاسىنىڭ دەنساۋلىق ساقتاۋ باسقارماسى ونىڭ جاعدايىن تۇراقتى اۋىر دەپ باعالاعان.
جالپى مەديتسينالىق كومەككە سەگىز ادام جۇگىنگەن. ولاردىڭ جەتەۋى تەكسەرۋدەن كەيىن ۇيلەرىنە جىبەرىلگەن.
پوليتسيا وقيعا كەزىندە ادام قازا تاپقانى تۋرالى الەۋمەتتىك جەلىلەردە تاراعان اقپاراتتى جوققا شىعاردى. رەسمي مالىمەت بويىنشا، قازا تاپقاندار جوق.
قازىر تەرگەۋ جالعاسىپ جاتىر.
