شىمكەنتتە حالىقارالىق قارتتار كۇنىنە وراي قالانىڭ بەس اۋدانىنىڭ ارداگەرلەرىن بىرىكتىرگەن سپورتتىق تۋرنير ۇيىمداستىرىلدى. 60 ادام قاتىسقان ءداستۇرلى سايىس بيىل سەگىزىنشى رەت وتكىزىلدى.
ءتۋرنيردىڭ اشىلۋ سالتاناتىندا شىمكەنت قالاسى اكىمىنىڭ ورىنباسارى سارسەن قۇرانبەك ءسوز سويلەدى. ول قالالىق ارداگەرلەر كەڭەسىنىڭ اتقارىپ جاتقان جۇمىسىنا جوعارى باعا بەرىپ، اعا بۋىن وكىلدەرىنە ايرىقشا قۇرمەت كورسەتۋ قاجەتتىگىن اتاپ ءوتتى.
قالا ارداگەرلەرى قوعامدىق ومىرگە بەلسەنە ارالاسىپ، جاستارعا دەنساۋلىقتى باعالاۋدىڭ، ءبىر-بىرىنە قولداۋ كورسەتۋدىڭ ۇلگىسىن كورسەتىپ كەلەدى. اعا بۋىن وكىلدەرى ەلىمىز بەن قالامىزدىڭ دامۋىنا زور ۇلەس قوسىپ، سالاماتتى ءومىر سالتىن ناسيحاتتاۋ ءىس-شارالارىنا دا بەلەسەنە قاتىسادى.
باعدارلاماعا سپورتتىڭ بەس ءتۇرى ەنگىزىلگەن. ولار – بيليارد، ۇستەل تەننيسى، شاحمات، دويبى جانە ۆولەيبول. ءار قاتىسۋشى الدىمەن ءوز اۋدانىندا ىرىكتەۋدەن ءوتىپ، ۇزدىكتەرى قالالىق فينالدىق كەزەڭدە باس قوستى. جارىستاردى وتكىزۋ ءۇشىن ارنايى سپورت زالدارى ازىرلەنگەن. جارىس بارىسىندا جەڭىمپازدار مەن جۇلدەگەرلەر انىقتالىپ، ولارعا مەدالدار، كۋبوكتار مەن گراموتالار تابىستالادى. دەگەنمەن ۇيىمداستىرۋشىلاردىڭ ايتۋىنشا، بۇل ءتۋرنيردىڭ ءمانى جۇلدەلى ورىندار ءۇشىن كۇرەسپەن عانا شەكتەلمەيدى.
– ءبىزدىڭ ماقساتىمىز – ارداگەرلەر اراسىندا سپورتپەن تۇراقتى شۇعىلدانۋدى ناسيحاتتاۋ، ولاردىڭ بەلسەندىلىگىن ارتتىرىپ، دەنساۋلىعىن نىعايتۋ. ەڭ باستىسى – جارىستىڭ ناتيجەسى ەمەس، سپورتقا دەگەن قىزىعۋشىلىق. ءبىز اعا بۋىن وكىلدەرىنىڭ كوبىرەك قوزعالىپ، ءجيى جۇزدەسىپ، قالا ومىرىنە بەلسەندى ارالاسا بەرگەنىن قالايمىز، – دەيدى قالالىق ارداگەرلەر كەڭەسىنىڭ توراعاسى كەنجەحان تولەباەۆ.
ونىڭ ايتۋىنشا، مۇنداي تۋرنير قالادا تۇراقتى وتكىزىلۋدە. وسى جىلدار ىشىندە تۋرنير ءارتۇرلى اۋداندا تۇراتىن، بىراق رۋحاني جاقىندىعى مەن ورتاق قىزىعۋشىلىقتارى بار ادامداردى بىرىكتىرەتىن جاقسى داستۇرگە اينالدى.
ارداگەرلەردىڭ جىگەرى مەن قالا ومىرىنە ارالاسۋعا دەگەن قۇلشىنىسى، ءوز قاتارلاستىرمەن سايىسقا ءتۇسۋى قۇرمەتكە عانا ەمەس، قولداۋعا دا لايىق. بۇل ءىس-شارانىڭ جاستارعا دا بەرەر تاعىلىمى مول.
