ۇلىتاۋ وبلىسىندا 39 216 وقۋشى قوسىمشا بىلىممەن قامتىلعان. بۇل وڭىردەگى وقۋشىلاردىڭ جالپى سانىنىڭ 73,6 پايىزىن قۇرايدى، دەپ حابارلايدى ادىرنا ۇلتتىق پورتالى.
قازىرگى تاڭدا وبلىستا 10 قوسىمشا ءبىلىم بەرۋ ۇيىمى جۇمىس ىستەيدى. ولاردا 8 415 وقۋشى ءبىلىم السا، مەكتەپتەر جانىنداعى ۇيىرمەلەر مەن سپورت سەكتسيالارىنا 30 801 وقۋشى قاتىسادى.
وڭىردە بالالاردىڭ قىزىعۋشىلىعى مەن قابىلەتىنە قاراي شىعارماشىلىق، مۋزىكا، بەينەلەۋ ونەرى، سپورت جانە تانىمدىق باعىتتار بويىنشا ءتۇرلى ۇيىرمە مەن سەكتسيالار ۇيىمداستىرىلعان. بۇل بالالاردىڭ بوس ۋاقىتىن ءتيىمدى وتكىزۋىنە، قابىلەتتەرىن شىڭداپ، جاڭا داعدىلاردى مەڭگەرۋىنە مۇمكىندىك بەرەدى.
قوسىمشا ءبىلىم بەرۋ جۇمىستارى «ادال ازامات» ءبىرتۇتاس تاربيە باعدارلاماسىنىڭ قۇندىلىقتارىمەن، «تازا قازاقستان» باستاماسىمەن جانە «زاڭ مەن ءتارتىپ» قاعيداتىمەن ۇشتاستىرىلا جۇرگىزىلۋدە.
اتاپ ايتقاندا، سپورتتىق جارىستار، شىعارماشىلىق بايقاۋلار مەن تانىمدىق ءىس-شارالار ارقىلى وقۋشىلاردىڭ بويىندا ادالدىق، جاۋاپكەرشىلىك، ەڭبەكقورلىق، وتانسۇيگىشتىك جانە ءوزارا قۇرمەت سياقتى قۇندىلىقتاردى قالىپتاستىرۋعا باسىمدىق بەرىلگەن. سونىمەن قاتار بالالاردى قورشاعان ورتانى قورعاۋعا، تازالىق ساقتاۋعا جانە قوعامدىق ءتارتىپ پەن زاڭ تالاپتارىن قۇرمەتتەۋگە تاربيەلەۋ جۇمىستارى جۇرگىزىلەدى.
وبلىستىق ءبىلىم باسقارماسىنىڭ مالىمەتىنشە، الداعى ۋاقىتتا دا بالالاردى قوسىمشا بىلىممەن قامتۋ اياسىن كەڭەيتۋگە، ۇيىرمەلەر مەن سەكتسيالاردىڭ قولجەتىمدىلىگىن ارتتىرۋعا جانە ولاردىڭ جان-جاقتى دامۋىنا جاعداي جاساۋعا كوڭىل بولىنەدى.
اتا-انالار بالالارىنىڭ قىزىعۋشىلىعىنا سايكەس ۇيىرمەلەر مەن سەكتسيالارعا جازىلۋ ءتارتىبى جانە قاتىسۋ شارتتارى تۋرالى تولىق اقپاراتتى تۇرعىلىقتى جەرىندەگى قوسىمشا ءبىلىم بەرۋ ۇيىمدارىنان نەمەسە مەكتەپتەردەن الا الادى.
