اقتوبە وبلىسىندا 10 كاسىپكەر دەلدالدىق جەلىلەر تىزىمىنەن شىعارىلدى، دەپ حابارلايدى “ادىرنا” ۇلتتىق پورتالى “موي گورود” سايتىنا سىلتەمە جاساپ.
“كاسىپكەرلىك باسقارماسى باعانى نەگىزسىز كوتەرىپ جۇرگەن دەلدالداردى انىقتاۋ ءۇشىن كوميسسيا قۇردى. مونيتورينگ ناتيجەلەرى بويىنشا بىرقاتار زاڭ بۇزۋشىلىقتار انىقتالدى. ساۋدا باعاسىن اسىرىپ، تاۋارىن باعاسىن كورسەتپەي ساتقان ءۇش كاسىپكەرگە ايىپپۇل سالىنسا، قالعاندارىنا ەسكەرتۋ جاسالدى. سونداي-اق، 10 كاسىپكەر ءونىمسىز دەلدال تىزبەگىنەن شىعارىلدى»، - دەيدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى قۇسايىن سارسەمباي.
وبلىس اكىمدىگىنىڭ حابارلاۋىنشا، الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋعا 2018-2023 جىلدار ارالىعىندا 4,5 ملرد تەڭگە ءبولىندى. تۇراقتاندىرۋ قورى قۇرىلدى، ونىڭ وپەراتورى «اقتوبە اكك» اق.
“تۇراقتاندىرۋ قورىندا 31 توننا قاراقۇمىق، 300 توننا قانت، 560,3 توننا ءبىرىنشى سۇرىپتى ۇن جانە 68 توننا كۇرىش ونىمدەرى بار. وتكەن جىلدىڭ ءساۋىر ايىنان بەرى الەۋمەتتىك نان باعاسىنىڭ قىمباتتاۋىنا جول بەرمەۋ ماقساتىندا وبلىستاعى ءىرى ناۋبايحانالارعا 4604 توننا ءبىرىنشى سۇرىپتى ۇن بولىنگەن. قازىر 550 گراممدىق بولكە نان 86 تەڭگەدەن ساتىلۋدا. جالپى، الەۋمەتتىك ونىمدەردىڭ باعاسىن تۇراقتاندىرۋ ماقساتىندا ساۋدا جەلىلەرى مەن دۇكەندەرمەن 500-دەن استام مەموراندۋمعا قول قويىلدى. ناتيجەسىندە "انۆار" جانە "ساپا ماركەت" جەلىلەرىمەن ازىق – تۇلىك ونىمدەرىنە باعالىق ۇستەمەاقىنى 5 پايىزعا، اۋداندارداعى دۇكەندەردە 10 پايىزدان اسىرماۋعا ۋاعدالاستى", - دەدى قۇسايىن سارسەمباي.
“ادىرنا” ۇلتتىق پورتالى
