ەلوردادا Creative Aimaq رەسپۋبليكالىق جوباسى اياسىندا «Aqtobe Creative Days مادەني-كرەاتيۆتى كورمە-جارمەڭكەسى جۇمىسىن باستادى. ەكى كۇنگە جوسپارلانعان شارادا اقتوبە وبلىسىنىڭ 100-دەن استام كرەاتورى 30-عا جۋىق باعىت بويىنشا اۆتورلىق ونىمدەرىن، شىعارماشىلىق جوبالارى مەن جەرگىلىكتى برەندتەرىن تانىستىرادى.
ءىس-شارا كرەاتيۆتى يندۋستريالاردى دامىتۋ قورىنىڭ الاڭىندا، Qazaq Creative Hub كەڭىستىگىندە ءوتىپ جاتىر. قاتىسۋشىلار قاتارىندا قولونەر شەبەرلەرى، ديزاينەرلەر مەن سۋرەتشىلەر، مادەنيەت مەكەمەلەرىنىڭ شىعارماشىلىق ۇجىمدارى، IT ماماندارى جانە ت. بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى كۋرسانتتارى بار.
كورمەدە زەرگەرلىك بۇيىمدار، تەرى، اعاش، سۇيەك پەن جۇننەن جاسالعان تۋىندىلار، كيىز بۇيىمدارى، سىرماق، باسقۇر، ۇلتتىق اكسەسسۋارلار مەن كادەسىيلار ۇسىنىلعان. كەلۋشىلەر شەبەرلەردىڭ جۇمىس بارىسىن كورىپ، پراكتيكالىق شەبەرلىك ساباقتارىنا قاتىسا الادى.
باعدارلامادا زەرگەر بولات اتىراۋباەۆ، كيىز باسۋ شەبەرى رابيعا يسپۋلاتوۆا، قولونەر شەبەرى ەرقوساي ءابىلوۆ جانە سۋرەتشى قايرات نوعاەۆتىڭ ساباقتارى قاراستىرىلعان. ەكسپوزيتسيا ءداستۇرلى قولونەر ۇلگىلەرىمەن قاتار، زاماناۋي سۇرانىسقا بەيىمدەلگەن اۆتورلىق ونىمدەردى دە قامتيدى.
كورمە-جارمەڭكەنىڭ ءسان كەڭىستىگىندە اقتوبەلىك جەتى ديزاينەردىڭ توپتامالارى تانىستىرىلعان. ءسان كورسەتىلىمىنە «SAULEMAI COUTURE»، «Trumova Collection»، «SYRMAK»، «ULPAN SAN UI»، «MARKA» ءسان ۇيلەرى مەن Azamat SAIN برەندى قاتىسادى.
ماسەلەن، «SYRMAK» ءداستۇرلى سىرىلىپ تىگىلەتىن سىرت كيىم ۇلگىلەرىن زاماناۋي oversize پىشىنىمەن ۇيلەستىرسە، «Trumova Collection» ۇلتتىق ناقىشتى ايەلدەر كيىمىنە ەنگىزەدى. «ULPAN» مەن «SAULEMAI» دە ءداستۇرلى قۇندىلىقتاردى زاماناۋي ءسان تىلىمەن جەتكىزۋگە باسىمدىق بەرەدى.
2015 جىلى قۇرىلعان Azamat SAIN برەندى بالالار كيىمىنىڭ توپتاماسىن پاش ەتەدى. برەند ساپالى ماتەريالدارعا، كيىم بولشەكتەرىنىڭ مۇقيات ورىندالۋىنا جانە زاماناۋي ديزاينعا ءمان بەرەدى. ونىڭ ونىمدەرى بۇعان دەيىن شەتەلدىك ءسان الاڭدارىندا دا تانىستىرىلعان.
ديماش قۇدايبەرگەننىڭ شىعارماشىلىعىنا ارنالعان ەكسپوزيتسيا دا كورمە-جارمەڭكەدەن ورىن تاپتى. الەمگە تانىمال ءانشىنىڭ حالىقارالىق ساحناداعى جەتىستىكتەرى، شىعارماشىلىق ەرەكشەلىگى جانە تۋعان وڭىرىمەن بايلانىسىن كورسەتەتىن زاتتارى شارانىڭ ءسانىن كەلتىرىپ تۇر.
تەحنولوگيالىق باعىتتا ت. بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتى كۋرسانتتارىنىڭ IT-جوبالارى تانىستىرىلۋدا. بۇل ءبولىم جاس مامانداردىڭ تەحنيكالىق شىعارماشىلىعىن جانە تسيفرلىق شەشىمدەردى قولدانۋ مۇمكىندىكتەرىن كورسەتۋگە ارنالعان.
سونىمەن قاتار ادەبيەت پەن زاماناۋي ۆيزۋالدى ونەردىڭ بايلانىسى دا قامتىلعان. كورمەدە اقتوبە وڭىرىنەن شىققان اقىن-جازۋشىلاردىڭ كىتاپتارى جيناقتالعان Book Market جۇمىس ىستەيدى. كىتاپحانا سالاسىنداعى جاڭا جوبالار مەن وقۋ مادەنيەتىن دامىتۋعا باعىتتالعان باستامالار دا بۇل كرەاتورلار شاراسىندا پاش ەتىلگەن.
كورمە-جارمەڭكە كەلۋشىلەرى «دارىن» مەملەكەتتىك جاستار سىيلىعىنىڭ يەگەرى، جاس جازۋشى ءاليحان جاقسىلىقتىڭ اقتوبە وڭىرىنە ارنالعان انيماتسيالىق ءفيلمى، اقتوبە وبلىستىق «الاقاي» قۋىرشاق تەاترىنىڭ ەرەكشە بالالارعا ارنالعان «جىل مەزگىلدەرى» ينكليۋزيۆتى قويىلىمىن تاماشالاي الادى.
مۋزىكالىق باعدارلامادا «SherTer» كرەاتيۆتى جوباسىنىڭ ورىنداۋلارى، «جەرەبە life» ونەرلى جاستار جوباسىنىڭ كونتسەرتى جانە جاس كومپوزيتور ءارى كرەاتور سەرىك زاكاريانىڭ شىعارماشىلىق كەشى بار.
اقتوبە وبلىسىندا بۇگىندە 3 مىڭنان استام مادەنيەت قىزمەتكەرى ەڭبەك ەتەدى. «Aqtobe Creative Days» ولاردىڭ شىعارماشىلىق الەۋەتىن، وڭىرلىك برەندتەردى جانە اۆتورلىق ونىمدەردى رەسپۋبليكالىق اۋديتورياعا تانىستىرۋعا مۇمكىندىك بەرەدى. قولونەر، ءسان، ادەبيەت، تەاتر، مۋزىكا جانە IT باعىتتارىن بىرىكتىرگەن جوبا ءداستۇرلى مادەني مۇرا مەن زاماناۋي كرەاتيۆتى يندۋستريالاردىڭ ءوزارا بايلانىسىن كورسەتەدى.
