5 ماۋسىم – دۇنيەجۇزىلىك قورشاعان ورتانى قورعاۋ كۇنى جانە ەكولوگ كۇنىنە وراي سالتاناتتى ماراپاتتاۋ ءراسىمى وتكىزىلدى.
ءىس-شاراعا ەكولوگيا سالاسىنىڭ ارداگەرلەرى، ەكولوگتار، قورشاعان ورتانى قورعاۋ سالاسىنىڭ ماماندارى، كاسىپورىن وكىلدەرى مەن بەلسەندى ەرىكتىلەر قاتىستى.
سالتاناتتى شارادا اقتوبە وبلىسى اكىمىنىڭ ورىنباسارى عالىمجان ەلەۋوۆ قۇتتىقتاۋ ءسوز سويلەپ، ەكولوگيا سالاسى قىزمەتكەرلەرىنىڭ ءوڭىردىڭ تۇراقتى دامۋى مەن قورشاعان ورتانى قورعاۋداعى ماڭىزدى ءرولىن اتاپ ءوتتى.
«تابيعات – ادامزاتتىڭ ەڭ قىمبات بايلىعى، ورتاق ءۇيىمىز. ونى قورعاۋ، تابيعي تەپە-تەڭدىكتى ساقتاۋ جانە كەلەر ۇرپاققا تازا قورشاعان ورتا قالدىرۋ – بارشامىزدىڭ ورتاق مىندەتىمىز. مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان «تازا قازاقستان» جالپىۇلتتىق باعدارلاماسى قورشاعان ورتاعا دەگەن جاۋاپكەرشىلىكتى ارتتىرىپ، ەكولوگيالىق مادەنيەتتى قالىپتاستىرۋعا باعىتتالعان ماڭىزدى جوباعا اينالدى»، – دەدى عالىمجان ەلەۋوۆ.
وبلىس اكىمىنىڭ ورىنباسارى وڭىردەگى ەكولوگيالىق احۋالدى جاقسارتۋ باعىتىندا جۇيەلى جۇمىستار جۇرگىزىلىپ جاتقانىن اتاپ ءوتتى. ونىڭ ايتۋىنشا، «اقتوبە وبلىسىنىڭ ەكولوگيالىق ماسەلەلەرىن كەشەندى شەشۋ جونىندەگى 2024–2026 جىلدارعا ارنالعان جول كارتاسى» اياسىندا بىرقاتار ماڭىزدى جوبالار ىسكە اسىرىلۋدا.
اتاپ ايتقاندا، اقتوبە قالاسىندا تاۋلىگىنە 100 مىڭ تەكشە مەتر ونىمدىلىگى بار جاڭا كارىز-تازارتۋ قۇرىلىستارى كەشەنىن سالۋ جوسپارلانعان. قازىرگى ۋاقىتتا جوبانىڭ تەحنيكالىق-ەكونوميكالىق نەگىزدەمەسى ازىرلەنىپ، سمەتالىق قۇنى 53,5 ملرد تەڭگە كولەمىندە ايقىندالعان. نىساندى پايدالانۋعا بەرۋ 2028 جىلعا جوسپارلانىپ وتىر.
سونىمەن قاتار ءوڭىردىڭ ءىرى ونەركاسىپتىك كاسىپورىندارى اتموسفەرالىق شىعارىندىلاردى ازايتۋ باعىتىندا ناقتى شارالار قابىلداۋدا. «قازحروم» تۇك» اق اقتوبە فەرروقورىتپا زاۋىتىندا حالىقارالىق ستاندارتتارعا سايكەس تازالاۋ تيىمدىلىگى كەمىندە 99 پايىز بولاتىن №1 جانە №2 تسەحتاردىڭ گاز تازارتۋ قۇرىلىستارىن جاڭعىرتۋ جۇمىستارى اياقتالدى. ال اقتوبە حروم قوسىندىلارى زاۋىتىندا ەلەكتروفيلترلەر مەن سۇزگىلەردى ورناتۋ ناتيجەسىندە زياندى شىعارىندىلار كولەمىن 63 پايىزعا دەيىن تومەندەتۋگە مۇمكىندىك بەرىلدى.
مەرەكەلىك شارا بارىسىندا تابيعاتتى قورعاۋ ىسىنە قوسقان ەلەۋلى ۇلەستەرى مەن قورشاعان ورتانى ساقتاۋعا باعىتتالعان ناتيجەلى ەڭبەكتەرى ءۇشىن سالا ماماندارى ماراپاتتالدى.
