اقتوبەدە ابىلقايىر حان داڭعىلى بويىنداعى «اقتوبە» قوناقۇيىنىڭ ماڭىندا تسيفرلىق فونتان سىناق رەجيمىندە ىسكە قوسىلدى.
ونىڭ ەرەكشەلىگى — سۋ اعىندارى ارقىلى ءتۇرلى ورنەكتەردى، ارىپتەر مەن جازۋلاردى بەينەلەۋگە بولادى.
فونتان قالانىڭ قوعامدىق كەڭىستىگىن اباتتاندىرۋ جۇمىستارىنىڭ العاشقى كەزەڭى اياسىندا ورناتىلدى.
قاراۋسىز قالعان اۋماق قالا مەنشىگىنە قايتارىلدى
قوناقۇي ماڭىنداعى اۋماق ۇزاق جىلدار بويى جەكە مەنشىكتە بولىپ، قاراۋسىز قالعان. ونى قالا مەنشىگىنە قايتارۋ ءۇشىن سوت پروتسەستەرى جۇرگىزىلدى. بيىل جەر تەلىمى قالانىڭ مەنشىگىنە قايتارىلدى.
قالا اكىمى ازامات بەكەت بۇل اۋماقتى تۇرعىنداردىڭ دەمالۋىنا ارنالعان قوعامدىق كەڭىستىككە اينالدىرۋدى ۇسىندى. باستامانى «Oil West» كومپانياسى قولداپ، اباتتاندىرۋ جۇمىستارىن ءوز قاراجاتى ەسەبىنەن جۇرگىزۋگە كىرىستى.
بۇگىن كومپانيا ماماندارى تسيفرلىق فونتاندى سىناق رەجيمىندە ىسكە قوستى. قالا اكىمى ازامات بەكەت تۇرعىندارمەن بىرگە جاڭا نىساندى كورىپ، كومپانيا وكىلدەرىنە العىسىن ءبىلدىردى.
«فونتاندى سىناق رەجيمىندە قوسىپ كورىپ جاتىر ەكەنسىزدەر. وتە ادەمى، وسى ورتالىق داڭعىلدىڭ بويىنا جاراسىمدى بولدى دەپ ويلايمىن. كۇن سۋىتقان سوڭ، قىس ايلارىندا زاقىمدانباۋى ءۇشىن ونى كونسەرۆاتسيالاۋ قاجەت. سىزدەرگە العىسىمىز شەكسىز. كەلەسى جىلى دا وسى جۇمىستى جالعاستىرىپ، قوناقۇيگە دەيىنگى اۋماقتى تولىق اباتتاندىرىپ بەرەسىزدەر دەپ سەنەمىز»، – دەدى قالا اكىمى.
قوناقۇيگە دەيىنگى اۋماق اباتتاندىرىلادى
الداعى ۋاقىتتا تسيفرلىق فونتاننان قوناقۇيگە دەيىنگى 0,47 گەكتار اۋماقتى اباتتاندىرۋ جوسپارلانىپ وتىر. مۇندا جاسىل جەلەك وتىرعىزىلىپ، سۋارۋ جۇيەسى ورناتىلادى. سونىمەن قاتار ورنەكتى كەسپەتاس توسەلىپ، جارىقتاندىرۋ شامدارى، ورىندىقتار جانە تۇرعىنداردىڭ دەمالۋىنا ارنالعان وزگە دە ساياباق جابدىقتارى قويىلادى.
كومپانيا وكىلدەرىنىڭ ايتۋىنشا، بيىل نەگىزگى جۇمىستار فونتاندى ورناتۋعا جانە ونىڭ اينالاسىن اباتتاندىرۋعا باعىتتالعان.
ء«بىز قالا اكىمى ازامات باۋىرجانۇلىنىڭ ۇسىنىسىن قۋانا قولدادىق. ءوزىمىز دە قالانىڭ كوركەيۋىنە ۇلەس قوسقىمىز كەلدى.
فونتاننىڭ جوعارعى بولىگىنە ەلەكتروندى باسقارىلاتىن ارنايى فورسۋنكالار ورناتىلعان. ولار سۋدى بەلگىلى ءبىر ۋاقىت ارالىعىمەن جىبەرىپ، سۋ اعىندارى ارقىلى ءتۇرلى ورنەكتەردى، ارىپتەردى، جازۋلار مەن لوگوتيپتەردى بەينەلەۋگە مۇمكىندىك بەرەدى. جارىقديودتى جارىقتاندىرۋ بۇل كورىنىستى ودان ءارى اسەرلى ەتەدى.
فونتاننىڭ باعدارلاماسىن ءالى دە جەتىلدىرەمىز. بۇگىن ونى سىناق رەجيمىندە ىسكە قوستىق. باتىس وڭىردەگى، جالپى ەلىمىزدىڭ باسقا قالالارىندا ءدال وسىنداي، سۋ اعىندارى ارقىلى ورنەكتەر مەن جازۋلار قالىپتاستىراتىن تسيفرلىق فونتاندى كەزدەستىرمەدىك. ناتيجەسى جامان ەمەس دەپ ويلايمىن. ەڭ باستىسى، تۇرعىندارعا ۇناسا ەكەن»، – دەدى «Oil West» جشس-ءنىڭ جاۋاپتى وكىلى نۇربولات ماتاەۆ.
