Aqtöbede Äbılqaiyr han daŋǧyly boiyndaǧy «Aqtöbe» qonaqüiınıŋ maŋynda sifrlyq fontan synaq rejimınde ıske qosyldy.
Onyŋ erekşelıgı — su aǧyndary arqyly türlı örnekterdı, ärıpter men jazulardy beineleuge bolady.
Fontan qalanyŋ qoǧamdyq keŋıstıgın abattandyru jūmystarynyŋ alǧaşqy kezeŋı aiasynda ornatyldy.
Qarausyz qalǧan aumaq qala menşıgıne qaitaryldy
Qonaqüi maŋyndaǧy aumaq ūzaq jyldar boiy jeke menşıkte bolyp, qarausyz qalǧan. Ony qala menşıgıne qaitaru üşın sot prosesterı jürgızıldı. Biyl jer telımı qalanyŋ menşıgıne qaitaryldy.
Qala äkımı Azamat Beket būl aumaqty tūrǧyndardyŋ demaluyna arnalǧan qoǧamdyq keŋıstıkke ainaldyrudy ūsyndy. Bastamany «Oil West» kompaniiasy qoldap, abattandyru jūmystaryn öz qarajaty esebınen jürgızuge kırıstı.
Bügın kompaniia mamandary sifrlyq fontandy synaq rejimınde ıske qosty. Qala äkımı Azamat Beket tūrǧyndarmen bırge jaŋa nysandy körıp, kompaniia ökılderıne alǧysyn bıldırdı.
«Fontandy synaq rejimınde qosyp körıp jatyr ekensızder. Öte ädemı, osy ortalyq daŋǧyldyŋ boiyna jarasymdy boldy dep oilaimyn. Kün suytqan soŋ, qys ailarynda zaqymdanbauy üşın ony konservasiialau qajet. Sızderge alǧysymyz şeksız. Kelesı jyly da osy jūmysty jalǧastyryp, qonaqüige deiıngı aumaqty tolyq abattandyryp beresızder dep senemız», – dedı qala äkımı.
Qonaqüige deiıngı aumaq abattandyrylady
Aldaǧy uaqytta sifrlyq fontannan qonaqüige deiıngı 0,47 gektar aumaqty abattandyru josparlanyp otyr. Mūnda jasyl jelek otyrǧyzylyp, suaru jüiesı ornatylady. Sonymen qatar örnektı kespetas töselıp, jaryqtandyru şamdary, oryndyqtar jäne tūrǧyndardyŋ demaluyna arnalǧan özge de saiabaq jabdyqtary qoiylady.
Kompaniia ökılderınıŋ aituynşa, biyl negızgı jūmystar fontandy ornatuǧa jäne onyŋ ainalasyn abattandyruǧa baǧyttalǧan.
«Bız qala äkımı Azamat Bauyrjanūlynyŋ ūsynysyn quana qoldadyq. Özımız de qalanyŋ körkeiuıne üles qosqymyz keldı.
Fontannyŋ joǧarǧy bölıgıne elektrondy basqarylatyn arnaiy forsunkalar ornatylǧan. Olar sudy belgılı bır uaqyt aralyǧymen jıberıp, su aǧyndary arqyly türlı örnekterdı, ärıpterdı, jazular men logotipterdı beineleuge mümkındık beredı. Jaryqdiodty jaryqtandyru būl körınıstı odan ärı äserlı etedı.
Fontannyŋ baǧdarlamasyn älı de jetıldıremız. Bügın ony synaq rejimınde ıske qostyq. Batys öŋırdegı, jalpy elımızdıŋ basqa qalalarynda däl osyndai, su aǧyndary arqyly örnekter men jazular qalyptastyratyn sifrlyq fontandy kezdestırmedık. Nätijesı jaman emes dep oilaimyn. Eŋ bastysy, tūrǧyndarǧa ūnasa eken», – dedı «Oil West» JŞS-nıŋ jauapty ökılı Nūrbolat Mataev.
