Qazaqstan mūsylmandary dıni basqarmasy meşıttıŋ şyǧa berısındegı esık aldynda qyzǧa orynsyz söz aitqan er adamnyŋ ısın aiyptady, dep habarlaidy “Adyrna”.
Qazır äleumettık jelıde Aqtöbedegı meşıt ışınde bolǧan oqiǧa turaly türlı pıkır tarap jatyr. Qazaqstan mūsylmandary dıni basqarmasy osyǧan orai mälımdeme jasady.
“Meşıt – qūlşylyq pen tärbie ordasy. Onda kelgen ärbır azamat özın ädeppen, ızetpen ūstauǧa mındettı. İslam şariǧatynda özgege tıl tigızu, orynsyz söz aitu, äsırese äiel zatyna qolaisyz pıkır bıldıru – mūsylman ädebıne sai kelmeitın jäne aiyptalatyn ıs-äreket. Qazaqstan mūsylmandary dıni basqarmasy Aqtöbedegı oqiǧada qyz balaǧa orynsyz söz aitqan azamattyŋ äreketın aiyptaidy. Öitkenı mūndai äreket mūsylmandyqqa jat, ärı adamgerşılık qaǧidattaryna da sai emes. QMDB jamaǧatty sabyr men parasattylyqqa şaqyryp, jalǧan aqparat pen arandatuşylyq äreketterge ermeuge ündeidı. Qoǧamda beibıtşılık pen özara qūrmet mädenietın qalyptastyru – barşamyzdyŋ ortaq jauapkerşılıgımız”,- dep jazylǧan mälımdemede.
Eske salsaq, Aqtöbe tūrǧyny ortalyq meşıtke baryp, esık aldynda özın bögep tūrǧan er adam turaly jazdy. Keiın būl oqiǧa köpşılık arasynda keŋ tarap, talqyǧa tüstı. Polisiia meşıt ışınde keluşıge tiısken er adamdy polisiia bölımşesıne jetkızdı.
Sot qaulysymen 42 jastaǧy er adam 5 täulıkke qamalǧan edı.
