قازاقستان مۇسىلماندارى ءدىني باسقارماسى مەشىتتىڭ شىعا بەرىسىندەگى ەسىك الدىندا قىزعا ورىنسىز ءسوز ايتقان ەر ادامنىڭ ءىسىن ايىپتادى، دەپ حابارلايدى “ادىرنا”.
قازىر الەۋمەتتىك جەلىدە اقتوبەدەگى مەشىت ىشىندە بولعان وقيعا تۋرالى ءتۇرلى پىكىر تاراپ جاتىر. قازاقستان مۇسىلماندارى ءدىني باسقارماسى وسىعان وراي مالىمدەمە جاسادى.
“مەشىت – قۇلشىلىق پەن تاربيە ورداسى. وندا كەلگەن ءاربىر ازامات ءوزىن ادەپپەن، ىزەتپەن ۇستاۋعا مىندەتتى. يسلام شاريعاتىندا وزگەگە ءتىل تيگىزۋ، ورىنسىز ءسوز ايتۋ، اسىرەسە ايەل زاتىنا قولايسىز پىكىر ءبىلدىرۋ – مۇسىلمان ادەبىنە ساي كەلمەيتىن جانە ايىپتالاتىن ءىس-ارەكەت. قازاقستان مۇسىلماندارى ءدىني باسقارماسى اقتوبەدەگى وقيعادا قىز بالاعا ورىنسىز ءسوز ايتقان ازاماتتىڭ ارەكەتىن ايىپتايدى. ويتكەنى مۇنداي ارەكەت مۇسىلماندىققا جات، ءارى ادامگەرشىلىك قاعيداتتارىنا دا ساي ەمەس. قمدب جاماعاتتى سابىر مەن پاراساتتىلىققا شاقىرىپ، جالعان اقپارات پەن ارانداتۋشىلىق ارەكەتتەرگە ەرمەۋگە ۇندەيدى. قوعامدا بەيبىتشىلىك پەن ءوزارا قۇرمەت مادەنيەتىن قالىپتاستىرۋ – بارشامىزدىڭ ورتاق جاۋاپكەرشىلىگىمىز”،- دەپ جازىلعان مالىمدەمەدە.
ەسكە سالساق، اقتوبە تۇرعىنى ورتالىق مەشىتكە بارىپ، ەسىك الدىندا ءوزىن بوگەپ تۇرعان ەر ادام تۋرالى جازدى. كەيىن بۇل وقيعا كوپشىلىك اراسىندا كەڭ تاراپ، تالقىعا ءتۇستى. پوليتسيا مەشىت ىشىندە كەلۋشىگە تيىسكەن ەر ادامدى پوليتسيا بولىمشەسىنە جەتكىزدى.
سوت قاۋلىسىمەن 42 جاستاعى ەر ادام 5 تاۋلىككە قامالعان ەدى.
