سان-ديەگو قالاسىنداعى مەشىتتەردىڭ بىرىندە بولعان اتىس سالدارىنان ءۇش ادام قازا تاپتى، دەپ حابارلايدى "ادىرنا" ۇلتتىق پورتالى.
Reuters دەرەگىنشە، قايعىلى وقيعا قالا ورتالىعىنان سولتۇستىككە قاراي ورنالاسقان يسلام كەشەنىندە بولعان. اۋماقتا مەشىتپەن قاتار مەكتەپ تە ورنالاسقان. وقيعا كەزىندە عيمارات ىشىندە بالالار بولعانىمەن، ولاردىڭ بارلىعى دەر كەزىندە ەۆاكۋاتسيالانىپ، زارداپ شەكپەگەن.
الدىن الا مالىمەت بويىنشا، اتىس كەزىندە مەكتەپتە اراب ءتىلى، يسلامتانۋ جانە قۇران وقۋ كۋرستارى ءوتىپ جاتقان.
باق تاراتقان مالىمەتتە شابۋىل سالدارىنان ءۇش ەر ادام قازا تاپقانى ايتىلعان. ولاردىڭ ءبىرى – يسلام ورتالىعىنىڭ كۇزەتشىسى. تاعى قازا تاپقان ەكى ادامنىڭ كىم ەكەنى انىقتالىپ جاتىر.
سونىمەن قاتار وقيعا ورنىنان شابۋىل جاسادى دەگەن كۇدىككە ىلىنگەن ەكى ادامنىڭ دا ءمايىتى تابىلعان. پوليتسيا ولاردىڭ ءوز-وزىنە قول جۇمساۋى مۇمكىن ەكەنىن حابارلادى.
وقيعا سالدارىنان بىرنەشە ادام ءتۇرلى دەڭگەيدەگى جاراقاتپەن اۋرۋحاناعا جەتكىزىلگەن.
پوليتسيانىڭ مالىمەتىنشە، كۇدىكتىلەر – ەكى جاس جىگىت. قازىرگى ۋاقىتتا ولاردىڭ جەكە باسى مەن قىلمىس جاساۋ سەبەپتەرى انىقتالىپ جاتىر. تەرگەۋ اياسىندا ءدىني وشپەندىلىك نەگىزىندە جاسالعان شابۋىل نۇسقاسى دا قاراستىرىلۋدا.
