ماڭعىستاۋدا اسكەري وقۋ-جاتتىعۋ كەزىندە قازا تاپقان جانە زارداپ شەككەن اسكەري قىزمەتشىلەردىڭ وتباسىلارىنا تولەنەتىن قاراجات كولەمى جاريالانبايدى، دەپ حابارلايدى "ادىرنا" ۇلتتىق پورتالى.
بۇل تۋرالى ماڭعىستاۋ وبلىستىق قوعامدىق كەڭەسىنىڭ توراعاسى بەكمۇرات ءجۇسىپوۆ ايتتى.
ونىڭ ايتۋىنشا، مۇنداي شەشىم اسكەري قىزمەتشىلەردىڭ تۋىستارىنىڭ وتىنىشىمەن جانە جەكە دەرەكتەرىنىڭ قۇپيالىعىن ساقتاۋ ماقساتىندا قابىلدانعان.
بەكمۇرات ءجۇسىپوۆ كوميسسيانىڭ جۇمىسىن اياقتاعانىن، جينالعان قاراجاتتىڭ بەلگىلەنگەن تارتىپپەن ءبولىنىپ، ءتيىستى قۇجاتتارمەن راسىمدەلگەنىن ايتتى. ونىڭ سوزىنشە، قاراجاتتى ءبولۋ ۇدەرىسى قورعا اقشا تۇسكەن ساتتەن باستاپ الۋشىلارعا اۋدارىلعانعا دەيىن باقىلاۋدا بولعان.
ەسكە سالايىق، قايعىلى وقيعا 24 قىركۇيەكتە كاسپي تەڭىزىنىڭ جاعالاۋىندا وتكەن اسكەري وقۋ-جاتتىعۋ كەزىندە بولعان. «قايسار» كاتەرىنەن تەڭىزگە تۇسكەن 17 اسكەري قىزمەتشىنىڭ ۇشەۋى قۇتقارىلىپ، 14-ءى قازا تاپتى.
