امەريكالىق تەحنولوگيالىق الپاۋىت NVIDIA «قازاقتەلەكوم» اق جانە Firebird AI كومپانياسىمەن بىرلەسىپ، قازاقستانداعى ەسەپتەۋ ينفراقۇرىلىمىن كەڭەيتۋ جۇمىستارى تۋرالى حابارلادى. كومپانيانىڭ Instagram الەۋمەتتىك جەلىسىندەگى رەسمي پاراقشاسىندا NVIDIA نەگىزىن قالاۋشى ءارى باس اتقارۋشى ديرەكتورى دجەنسەن حۋانگتىڭ استاناعا ساپارىنىڭ قورىتىندىسى بويىنشا ءتيىستى جاريالانىم شىقتى.
23 قازاندا دجەنسەن حۋانگ قازاقستانعا العاش رەت كەلىپ، ەلدەگى جاساندى ينتەللەكتىنىڭ ۇلتتىق ەكوجۇيەسىنىڭ دامۋىمەن تانىستى، ستۋدەنتتەرمەن جانە تەحنولوگيالىق ستارتاپتار وكىلدەرىمەن كەزدەستى. NVIDIA رەسمي جاريالانىمىندا NVIDIA تەحنولوگيالارى نەگىزىندە ەسەپتەۋ قۋاتتارىن دامىتۋ باعىتىندا «قازاقتەلەكوم» جانە Firebird AI كومپانيالارىمەن جۇزەگە اسىرىلىپ جاتقان ىنتىماقتاستىققا ەرەكشە توقتالدى.
سونداي-اق كومپانيا Firebird AI جەرگىلىكتى جي-ستارتاپتار مەن زەرتتەۋشىلەردى قولداۋعا ارنالعان Firebird Labs Kazakhstan زەرتحاناسىن قۇرۋدى جوسپارلاپ وتىرعانىن حابارلادى. ونىڭ ىشىندە ەسەپتەۋ قۋاتتارىنا قولجەتىمدىلىكتى قامتاماسىز ەتۋ دە كوزدەلگەن.
بۇل باعىتتاعى نەگىزگى جوبالاردىڭ ءبىرى – ەكىباستۇز قالاسىندا جۇزەگە اسىرىلىپ جاتقان Data Center Valley جوباسى. بۇل – ەنەرگەتيكالىق قۋاتىن بولاشاقتا 1 گۆت-قا دەيىن ارتتىرۋ مۇمكىندىگى قاراستىرىلعان اۋقىمدى دەرەكتەردى وڭدەۋ ورتالىقتارىنىڭ كلاستەرى.
«قازاقتەلەكوم» اق باسقارما توراعاسى باعدات مۋسين Data Center Valley جوباسىن دجەنسەن حۋانگقا جەكە تانىستىرىپ، ونىڭ ينفراقۇرىلىمدىق مۇمكىندىكتەرى، ەنەرگەتيكالىق ارتىقشىلىقتارى جانە قازاقستاننىڭ جوعارى ءونىمدى ەسەپتەۋلەردىڭ حالىقارالىق ورتالىعىنا اينالۋ الەۋەتى تۋرالى ايتىپ بەردى.
جوبانىڭ ءبىرىنشى كەزەڭىندەگى 215 مۆت كولەمىندەگى قۋات تولىقتاي رەزەرۆتەلگەن. قۋاتى 50 مۆت بولاتىن العاشقى دەرەكتەر ورتالىعىن 2027 جىلدىڭ ەكىنشى توقسانىندا ىسكە قوسۋ جوسپارلانىپ وتىر.
باعدات مۋسين ءوز پىكىرىندە مەنشىكتى ەسەپتەۋ ينفراقۇرىلىمىن دامىتۋ قازاقستان ءۇشىن ستراتەگيالىق باسىمدىققا اينالىپ كەلە جاتقانىن اتاپ ءوتتى.
«بۇگىندە جاساندى ينتەللەكت سالاسىنداعى ەلدەردىڭ باسەكەگە قابىلەتتىلىگى الگوريتمدەردىڭ دامۋىمەن عانا ەمەس، مەنشىكتى ەسەپتەۋ ينفراقۇرىلىمىنىڭ بولۋىمەن دە ايقىندالادى. سوندىقتان ءبىز ەكىباستۇزدا Data Center Valley جوباسىن جۇزەگە اسىرىپ جاتىرمىز. ءبىزدىڭ ماقساتىمىز – قازاقستاندى ەسەپتەۋ رەسۋرستارىن تۇتىنۋشى ەلدەن جاساندى ينتەللەكتىگە ارنالعان قۋاتتاردىڭ الەمدىك جەتكىزۋشىلەرىنىڭ بىرىنە اينالدىرۋ. ءبىز بولاشاقتىڭ تەحنولوگيالارى قازاقستانعا جاي عانا كەلىپ قويماي، ءدال وسى جەردە جاسالىپ، دامىعانىن قالايمىز»، – دەپ اتاپ ءوتتى «قازاقتەلەكوم» اق باسقارما توراعاسى باعدات مۋسين.
NVIDIA جاريالاعان ماتەريالدا «قازاقتەلەكوم» كومپانياسىنىڭ استانا مەن الماتى قالالارىندا 400 NVIDIA H200 جانە 480 NVIDIA B300 گرافيكالىق پروتسەسسورىن ورنالاستىرعانى دا حابارلاندى. 2027 جىلى Data Center Valley اۋماعىندا 1000-نان استام GPU, سونداي-اق ەكىباستۇز ماڭىندا 1000-نان استام NVIDIA Vera Rubin جەدەلدەتكىشىن ورنالاستىرۋ جوسپارلانىپ وتىر.
NVIDIA مالىمەتىنشە، Firebird كومپانياسى قازاقستانعا 45 000 NVIDIA Grace Blackwell GPU ەكسپورتتاۋعا اقش-تىڭ ەكسپورتتىق ليتسەنزياسىن العان. جوبانىڭ ءبىرىنشى كەزەڭى Data Center Valley اۋماعىندا «قازاقتەلەكوممەن» بىرلەسىپ جۇزەگە اسىرىلىپ جاتىر. كوممەرتسيالىق ىسكە قوسۋ 2027 جىلدىڭ ءۇشىنشى توقسانىنا جوسپارلانعان.
مۇنداي ەسەپتەۋ قۋاتتارىن دامىتۋ قازاقستاندىق كاسىپورىنداردىڭ، عىلىمي ۇيىمداردىڭ جانە ازىرلەۋشىلەردىڭ زاماناۋي جاساندى ينتەللەكت تەحنولوگيالارىنا قولجەتىمدىلىگىن كەڭەيتۋگە مۇمكىندىك بەرەدى.
وسىلايشا، «قازاقتەلەكومنىڭ» حالىقارالىق تەحنولوگيالىق كومپانيالارمەن ىنتىماقتاستىعى قازاقستاننىڭ تسيفرلىق تەحنولوگيالاردى تۇتىنۋشى ەلدەن جاھاندىق جي نارىعىنا ارنالعان ەسەپتەۋ ينفراقۇرىلىمىن جەتكىزۋشى ەلگە اينالۋىنا باعىتتالعان اۋقىمدى ترانسفورماتسيانىڭ ءبىر بولىگىنە اينالىپ وتىر.
