Amerikalyq tehnologiialyq alpauyt NVIDIA «Qazaqtelekom» AQ jäne Firebird AI kompaniiasymen bırlesıp, Qazaqstandaǧy esepteu infraqūrylymyn keŋeitu jūmystary turaly habarlady. Kompaniianyŋ Instagram äleumettık jelısındegı resmi paraqşasynda NVIDIA negızın qalauşy ärı bas atqaruşy direktory Djensen Huangtyŋ Astanaǧa saparynyŋ qorytyndysy boiynşa tiıstı jariialanym şyqty.
23 qazanda Djensen Huang Qazaqstanǧa alǧaş ret kelıp, eldegı jasandy intellektınıŋ ūlttyq ekojüiesınıŋ damuymen tanysty, studenttermen jäne tehnologiialyq startaptar ökılderımen kezdestı. NVIDIA resmi jariialanymynda NVIDIA tehnologiialary negızınde esepteu quattaryn damytu baǧytynda «Qazaqtelekom» jäne Firebird AI kompaniialarymen jüzege asyrylyp jatqan yntymaqtastyqqa erekşe toqtaldy.
Sondai-aq kompaniia Firebird AI jergılıktı Jİ-startaptar men zertteuşılerdı qoldauǧa arnalǧan Firebird Labs Kazakhstan zerthanasyn qūrudy josparlap otyrǧanyn habarlady. Onyŋ ışınde esepteu quattaryna qoljetımdılıktı qamtamasyz etu de közdelgen.
Būl baǧyttaǧy negızgı jobalardyŋ bırı – Ekıbastūz qalasynda jüzege asyrylyp jatqan Data Center Valley jobasy. Būl – energetikalyq quatyn bolaşaqta 1 GVt-qa deiın arttyru mümkındıgı qarastyrylǧan auqymdy derekterdı öŋdeu ortalyqtarynyŋ klasterı.
«Qazaqtelekom» AQ Basqarma töraǧasy Baǧdat Musin Data Center Valley jobasyn Djensen Huangqa jeke tanystyryp, onyŋ infraqūrylymdyq mümkındıkterı, energetikalyq artyqşylyqtary jäne Qazaqstannyŋ joǧary önımdı esepteulerdıŋ halyqaralyq ortalyǧyna ainalu äleuetı turaly aityp berdı.
Jobanyŋ bırınşı kezeŋındegı 215 MVt kölemındegı quat tolyqtai rezervtelgen. Quaty 50 MVt bolatyn alǧaşqy derekter ortalyǧyn 2027 jyldyŋ ekınşı toqsanynda ıske qosu josparlanyp otyr.
Baǧdat Musin öz pıkırınde menşıktı esepteu infraqūrylymyn damytu Qazaqstan üşın strategiialyq basymdyqqa ainalyp kele jatqanyn atap öttı.
«Bügınde jasandy intellekt salasyndaǧy elderdıŋ bäsekege qabılettılıgı algoritmderdıŋ damuymen ǧana emes, menşıktı esepteu infraqūrylymynyŋ boluymen de aiqyndalady. Sondyqtan bız Ekıbastūzda Data Center Valley jobasyn jüzege asyryp jatyrmyz. Bızdıŋ maqsatymyz – Qazaqstandy esepteu resurstaryn tūtynuşy elden jasandy intellektıge arnalǧan quattardyŋ älemdık jetkızuşılerınıŋ bırıne ainaldyru. Bız bolaşaqtyŋ tehnologiialary Qazaqstanǧa jai ǧana kelıp qoimai, däl osy jerde jasalyp, damyǧanyn qalaimyz», – dep atap öttı «Qazaqtelekom» AQ Basqarma töraǧasy Baǧdat Musin.
NVIDIA jariialaǧan materialda «Qazaqtelekom» kompaniiasynyŋ Astana men Almaty qalalarynda 400 NVIDIA H200 jäne 480 NVIDIA B300 grafikalyq prosessoryn ornalastyrǧany da habarlandy. 2027 jyly Data Center Valley aumaǧynda 1000-nan astam GPU, sondai-aq Ekıbastūz maŋynda 1000-nan astam NVIDIA Vera Rubin jedeldetkışın ornalastyru josparlanyp otyr.
NVIDIA mälımetınşe, Firebird kompaniiasy Qazaqstanǧa 45 000 NVIDIA Grace Blackwell GPU eksporttauǧa AQŞ-tyŋ eksporttyq lisenziiasyn alǧan. Jobanyŋ bırınşı kezeŋı Data Center Valley aumaǧynda «Qazaqtelekommen» bırlesıp jüzege asyrylyp jatyr. Kommersiialyq ıske qosu 2027 jyldyŋ üşınşı toqsanyna josparlanǧan.
Mūndai esepteu quattaryn damytu qazaqstandyq käsıporyndardyŋ, ǧylymi ūiymdardyŋ jäne äzırleuşılerdıŋ zamanaui jasandy intellekt tehnologiialaryna qoljetımdılıgın keŋeituge mümkındık beredı.
Osylaişa, «Qazaqtelekomnyŋ» halyqaralyq tehnologiialyq kompaniialarmen yntymaqtastyǧy Qazaqstannyŋ sifrlyq tehnologiialardy tūtynuşy elden jahandyq Jİ naryǧyna arnalǧan esepteu infraqūrylymyn jetkızuşı elge ainaluyna baǧyttalǧan auqymdy transformasiianyŋ bır bölıgıne ainalyp otyr.
