Halyk Bank پەن «قازاقستاندىق كوممۋنالدىق جۇيەلەر» (ككس) تۇركىستان وبلىسىندا «جۇزىمدىك» جەل ەلەكتر ستانتسياسىن (جەس) سالۋ تۋرالى كەلىسىمگە قول قويدى. جوبانى قارجىلاندىرۋ كولەمى 138 ملن اقش دوللارىن قۇرايدى.
جاڭا ەلەكتر ستانتسياسى وڭىردە جاڭارتىلاتىن ەنەرگيا كوزدەرىنەن وندىرىلەتىن ەلەكتر ەنەرگياسىنىڭ كولەمىن ارتتىرۋعا، ەكولوگيالىق تازا ەنەرگيانى پايدالانۋدى كەڭەيتۋگە جانە ايماقتىڭ ەنەرگەتيكالىق تەڭگەرىمىن ارتاراپتاندىرۋعا مۇمكىندىك بەرەدى.
قۇرىلىستى 2027 جىلدىڭ ناۋرىز ايىندا باستاۋ جوسپارلانعان. ال نىساندى پايدالانۋعا بەرۋ 2028 جىلدىڭ قىركۇيەگىنە بەلگىلەنگەن.
Halyk Bank باسقارما توراعاسىنىڭ ورىنباسارى ولگا ۆۋروس كەلىسىمگە قاتىستى پىكىر ءبىلدىرىپ، بانكتىڭ ESG ستراتەگياسى اياسىندا ەكولوگيالىق جوبالاردى قارجىلاندىرۋدىڭ جانە قازاقستاننىڭ تۇراقتى دامۋىنا ۇلەس قوسۋدىڭ ماڭىزىن اتاپ ءوتتى.
«“جۇزىمدىك” جەل ەلەكتر ستانتسياسىن قارجىلاندىرۋعا قاتىسۋ ءبىز ءۇشىن ايرىقشا ماڭىزعا يە. بۇل – “قازاقستاندىق كوممۋنالدىق جۇيەلەر” كومپانياسىنىڭ ستراتەگيالىق ينۆەستيتسيالىق باستاماسىن قولداۋمەن قاتار، ەلىمىزدىڭ ۇزاق مەرزىمدى ەكولوگيالىق جانە ەكونوميكالىق ماقساتتارىنا قول جەتكىزۋگە مۇمكىندىك بەرەتىن جوبا. ءبىز مۇنى زاماناۋي ەنەرگەتيكالىق ينفراقۇرىلىمدى دامىتۋعا سالىنعان ينۆەستيتسيا عانا ەمەس، قازاقستاننىڭ تۇراقتى ءارى ەكولوگيالىق جاۋاپتى ەنەرگەتيكالىق جۇيەسىن قالىپتاستىرۋعا قوسىلعان ۇلەس رەتىندە قاراستىرامىز»، – دەدى ولگا ۆۋروس.
جەل ەلەكتر ستانتسياسىنىڭ قۇرىلىسى بىرنەشە كەزەڭمەن جۇزەگە اسىرىلادى. ءبىرىنشى كەزەڭدە قۋاتى 150 مۆت بولاتىن گەنەراتسيالاۋ نىساندارىن ىسكە قوسۋ كوزدەلگەن. كەيىن ستانتسيانىڭ جالپى قۋاتىن 350 مۆت-قا دەيىن ۇلعايتۋ مۇمكىندىگى قاراستىرىلعان.
ءبىرىنشى كەزەڭ اياسىندا ارقايسىسىنىڭ قۋاتى 7,5 مۆت بولاتىن 20 جەل تۋربيناسىن ورناتۋ، كەرنەۋى 35/220 كۆ قوسالقى ستانتسيا سالۋ جانە ۇزىندىعى شامامەن 22 شاقىرىم بولاتىن 220 كۆ اۋە ەلەكتر جەلىسىن تارتۋ جوسپارلانىپ وتىر.
جوبانى ىسكە اسىرۋ قازاقستاننىڭ جاڭارتىلاتىن ەنەرگەتيكا سالاسىن دامىتۋعا، ەلدىڭ ەنەرگەتيكالىق تەڭگەرىمىن ارتاراپتاندىرۋعا جانە تومەن كومىرتەكتى ەكونوميكاعا كوشۋىنە باعىتتالعان باستامالاردىڭ بىرىنە اينالادى.
«قازاقستاندىق كوممۋنالدىق جۇيەلەر» كومپانياسى بۇل ينۆەستيتسيالىق جوبانى «New Clean Energy» جشس ارقىلى جۇزەگە اسىرادى. سونىمەن قاتار جوباعا قازاقستاننىڭ دامۋ بانكىن (قدب) تارتۋ جوسپارلانىپ وتىر.
