الماتىداعى Esentai City تۇرعىن ءۇي كەشەنىندە گاز-اۋا قوسپاسىنىڭ جارقىلى سالدارىنان ەكى كامەلەتكە تولماعان بالا جاراقات الدى، دەپ حابارلايدى “ادىرنا”.
وقيعا 22 قازاندا مەدەۋ اۋدانىنداعى قاپپاروۆ كوشەسىندە ورنالاسقان ءۇش قاباتتى تۇرعىن ۇيدە بولعان.
الماتى قالاسى اكىمدىگى ءباسپاسوز قىزمەتىنىڭ مالىمەتىنشە، الدىن الا بولجام بويىنشا، وقيعاعا تابيعي گازدىڭ شىعۋى سەبەپ بولۋى مۇمكىن.
جاراقات العان 2015 جانە 2017 جىلى تۋعان بالالار مەديتسينالىق تەكسەرۋدەن ءوتىپ، قاجەتتى كومەك كورسەتىلگەن سوڭ ۇيلەرىنە جىبەرىلدى.
بەيرەسمي دەرەك بويىنشا، وقيعا تاڭعى ساعات 06:55 شاماسىندا بولعان. الدىن الا مالىمەت بويىنشا، جارىلىس سالدارىنان ەكى پاتەردىڭ قابىرعالارى قيراپ، شامامەن 75 شارشى مەتر اۋماق زاقىمدانعان. سونداي-اق Depal ماركالى اۆتوكولىك بۇلىنگەن.
وقيعا ورنىنا الماتى قالاسى تجد 25 قىزمەتكەرى مەن 6 تەحنيكاسى جۇمىلدىرىلعان.
