فوتو جي-مەن جاسالعان
قازاقستاندا 2027 جىلعى 1 قاڭتاردان باستاپ اتاۋلى الەۋمەتتىك كومەك تاعايىنداۋ ءتارتىبى وزگەرەدى، دەپ حابارلايدى "ادىرنا" ۇلتتىق پورتالى.
جاڭا ەرەجەلەرگە سايكەس، كومەككە ءوتىنىش بەرگەن ازاماتتار جەكە دەرەكتەرىن وڭدەۋگە، سونداي-اق قارجىلىق جاعدايىنا قاتىستى مالىمەتتەردى تەكسەرۋگە كەلىسىم بەرۋگە ءتيىس.
پرەمەر-مينيستر ولجاس بەكتەنوۆ قول قويعان قاۋلىدا اتاۋلى الەۋمەتتىك كومەك تاعايىنداۋ كەزىندە ەسكەرىلەتىن تالاپتار مەن شەكتەۋلەر كورسەتىلگەن. ءوتىنىش بەرۋشىلەردىڭ مۇلىكتىك جاعدايى، بانكتىك وپەراتسيالارى، العان قارىزدارى مەن جيناقتارى قارالادى. ءاربىر ءوتىنىش بويىنشا شەشىمدى كوميسسيا قابىلدايدى.
ەگەر وتباسىنىڭ بىرنەشە باسپاناسى بولسا، وعان اتاۋلى الەۋمەتتىك كومەك تاعايىندالماۋى مۇمكىن. الايدا ءار ادامعا شاققانداعى تۇرعىن ءۇي اۋماعى 18 شارشى مەتردەن اسپاسا نەمەسە باسپانا اپاتتى جاعدايدا بولسا، كوميسسيا بۇل ءمان-جايلاردى ەسكەرە الادى. وتباسىنىڭ كىرىس تۇسىرەتىن كوممەرتسيالىق عيماراتى نەمەسە نىسانى بولسا، بۇل دا كومەك تاعايىنداۋ كەزىندە ەسكەرىلەدى.
تۇرعىن ءۇيى بار وتباسىنىڭ ءۇي سالۋعا ارنالعان قوسىمشا جەر تەلىمى بولسا، وعان ااك بەرىلمەۋى مۇمكىن. بۇل تالاپ اكىمدىك كەزەگى ارقىلى تەگىن بەرىلگەن جەر تەلىمدەرىنە قولدانىلمايدى.
وتباسىنىڭ بىرنەشە جارامدى كولىگى بولۋى كومەك تاعايىنداۋعا اسەر ەتۋى مۇمكىن. دەگەنمەن كوپبالالى وتباسىلارعا جانە ءبىرىنشى نەمەسە ەكىنشى توپتاعى مۇگەدەكتىگى بار بالانى تاربيەلەپ وتىرعان وتباسىلارعا قاتىستى ەرەكشەلىكتەر قاراستىرىلعان.
ءوتىنىش بەرىلگەنگە دەيىنگى توقسانداعى بانك شوتتارى بويىنشا كىرىس پەن شىعىس كولەمى وتباسىنىڭ ءار مۇشەسىنە شاققانداعى كەدەيلىك شەگىنەن اسىپ كەتسە، ااك تاعايىندالماۋى مۇمكىن. بۇل رەتتە سالىقتار، بيۋدجەتكە تولەنەتىن مىندەتتى تولەمدەر، ساقتاندىرۋ جارنالارى جانە وتباسى مۇشەلەرىنىڭ ءوزارا اۋدارىمدارى ەسەپكە الىنبايدى.
ءوتىنىش بەرىلگەنگە دەيىنگى توقساندا وتباسىنىڭ ءار مۇشەسىنە شاققاندا 101 مىڭ تەڭگەدەن اساتىن قارىز نەمەسە ميكروكرەديت الىنعان بولسا، كومەك تاعايىنداۋدان باس تارتىلۋى مۇمكىن.
وتباسىنىڭ جيناق سالىمى 200 ايلىق ەسەپتىك كورسەتكىشتەن (اەك) اسسا، ااك بەرىلمەۋى مۇمكىن. الايدا باسپانا ساتىپ الۋعا ارنالعان باستاپقى جارناعا قاتىستى ەرەكشەلىك قاراستىرىلعان.
جاڭا ءتارتىپ بويىنشا اتاۋلى الەۋمەتتىك كومەك تاعايىنداۋ كەزىندە وتباسىنىڭ ناقتى قارجىلىق جانە مۇلىكتىك جاعدايى ەسكەرىلەدى. سوندىقتان ءوتىنىش بەرۋشىنىڭ تالاپتارعا سايكەستىگى ءار جاعدايدا جەكە قارالادى.
