پاۆلوداردا 9 تىلدە ەركىن سويلەيتىن بويجەتكەن تۇرادى. 11-سىنىپ وقۋشىسى قازىر شەت ءتىلىن ۇيرەنۋگە نيەتتى ازاماتتارعا ءدارىس بەرەدى. جاستايىنان ءتۇرلى ءتىل ۇيرەنۋگە دەگەن قارىم-قابىلەتى ونى قازىردىڭ وزىندە ۇلكەن تابىسقا كەنەلتكەن. ايحانىم وقاسوۆا ءوز ەڭبەگىنىڭ ناتيجەسىندە استانادان باسپانا ساتىپ الىپتى. بۇل تۋرالى"جەتىنشى ارنا" تەلەارناسى جاريالادى، دەپ حابارلايدى "ادىرنا".
ءتىل ۇيرەنۋگە دەگەن قىزىعۋشىلىق ايحانىم وقاسوۆاعا اناسىنان دارىعان. اۋەلى قازاق ءتىلىن جەتىلدىرىپ، كەيىن اعىلشىن تىلىنە دەن قويدى. ال ۋاقىت وتە كەلە فرانتسۋز اندەرىنە اۋەستەنىپ، وسى تىلگە ەرەكشە سۇيىسپەنشىلىك تانىتتى.
«فرانتسۋز تىلىنەن كەيىن پاۆلودار قالاسىنداعى جاستار رەسۋرستىق ورتالىعىندا كارىس ءتىلى بويىنشا تەگىن كۋرستار اشىلدى. كەيىن كۋرس اياقتالسا دا، بىراق بۇل تىلگە دەگەن قىزىعۋشىلىعىم باسىلعان جوق. يەروگليفتەرمەن العاش رەت بەتپە-بەت كەلگەن تاجىريبەم ەدى. كورەي ءتىلىن جاقسى دەڭگەيدە مەڭگەرگەننەن كەيىن اراب ءتىلىن ۇيرەنە باستادىم، ال اراب تىلىنەن سوڭ قىتاي تىلىنە كوشتىم. قازىرگى تاڭدا تۇرىك جانە نەمىس تىلدەرىندە ەركىن سويلەي الامىن»، — دەيدى ايحانىم.
ايحانىم شەت تىلدەرىن مەڭگەرۋدى 6-سىنىپتان باستاعان. كوپتەگەن ءتىلدى ول ءوز بەتىنشە وقۋلىقتار مەن بەينەساباقتار جانە تىكەلەي قارىم-قاتىناس ارقىلى ۇيرەنگەن.
ء«ارتۇرلى ماتەريالدار الاتىنمىن. ماسەلەن، ورىس تىلىندەگى ماقالالاردى قازاق تىلىنە اۋداراتىنمىن. اراب تىلىنەن كورەي تىلىنە، كورەي تىلىنەن اراب تىلىنە، قىتاي تىلىنەن اعىلشىن تىلىنە، اعىلشىن تىلىنەن قىتاي تىلىنە اۋدارىپ جاتتىعاتىنمىن. سونىمەن قاتار ءتىل تاسىمالداۋشىلارىمەن دە كوپ تاجىريبە جاسادىم. ولاردى ءوزىم ينتەرنەت ارقىلى تاۋىپ، بايلانىس ورناتتىم. شەتەلدە تۇراتىن دوستارىم مەن تانىستارىم كوپ، سولارمەن سويلەسىپ، جاتتىقتىم»، — دەيدى وقۋشى.
ناتيجە بار. بۇگىندە ايحانىم 9 ءتىلدى جەتىك مەڭگەرىپ، ءبىلىمىن ودان ءارى جەتىلدىرىپ ءجۇر. ول ءۇشىن ءتىل — ءتۇرلى مەملەكەتتىڭ مادەنيەتىن تانىپ، ادامدارمەن بايلانىس ورناتۋدىڭ نەگىزگى قۇرالى.
قازىر ايحانىم مەكتەپتە وقيدى، ءارى شەت تىلدەرىنەن ونلاين ساباق بەرەدى. جاس پوليگلوت بولاشاقتا بەدەلدى شەتەل ۋنيۆەرسيتەتىنە وقۋعا ءتۇسىپ، جەر جاھاندى ارالاۋدى ارماندايدى.
