تۇركيانىڭ قاھرامانماراش قالاسىنداعى ورتا مەكتەپتەردىڭ بىرىندە اتىس بولدى، دەپ حابارلايدى «ادىرنا» ءتىلشىسى Yeniçağ Gazetesi-گە سىلتەمە جاساپ.
وقيعا ونيكيشۋبات اۋدانىندا بولعان. مالىمەتكە سايكەس، 8-سىنىپ وقۋشىسى مەكتەپكە تاپانشا الىپ كەلىپ، ەكى سىنىپقا وق اتقان. وقيعا ورنىنا جەدەل جاردەم مەن پوليتسيانىڭ كوپتەگەن بريگاداسى جىبەرىلىپ، وقۋ ورنىنىڭ اۋماعى قورشاۋعا الىنعان.
تۇركيانىڭ ىشكى ىستەر ءمينيسترى مۋستافا چيفتچي سەگىز وقۋشى مەن ءبىر مۇعالىمنىڭ كوز جۇمعانىن مالىمدەدى. ايتۋىنشا، زارداپ شەككەن 13 ادام اۋرۋحانالاردا جاتىر. ولاردىڭ التاۋى جانساقتاۋ بولىمىندە، ۇشەۋىنىڭ جاعدايى اۋىر.
سونداي-اق مەكتەپكە شابۋىل جاساعان 8-سىنىپ وقۋشىسى ەكەنى، ونىڭ ءوز-وزىنە قول جۇمساعانى حابارلاندى.
ايتا كەتەيىك، بۇدان ءبىر كۇن بۇرىن تۇركيانىڭ شىعىسىنداعى سيۆەرەك قالاسىندا مەكتەپكە قارۋلى شابۋىل جاسالعان. كۇدىكتى — 18 جاستاعى جىگىت. اتىس سالدارىنان 16 ادام جاراقات العان.
