قازاقستاندىق دزيۋدوشى جۇرقامىرزا شۇكىربەكوۆ جاپونيانىڭ ايتي-ناگويا قالاسىندا ءوتىپ جاتقان V ازيا پارا ويىندارىندا التىن مەدال جەڭىپ الدى، دەپ حابارلايدى "ادىرنا" ۇلتتىق پورتالى.
بۇل – قازاقستان قۇراماسىنىڭ بيىلعى جارىستاعى ونىنشى التىن جۇلدەسى. 21 قازاندا 95 كەلىدەن جوعارى سالماق دارەجەسىندە، J2 ساناتىندا ونەر كورسەتكەن جۇرقامىرزا شۇكىربەكوۆ جارتىلاي فينالدا يران وكىلى اميرحوسسەين نيمرۋزي ناۆوحيمەن بەلدەستى. قازاقستاندىق سپورتشى قارسىلاسىن 2 مينۋت 50 سەكۋندتا يپپون ادىسىمەن جەڭدى.
فينالدىق كەزدەسۋدە شۇكىربەكوۆ تاعى ءبىر يراندىق دزيۋدوشى مۇحاممادرەزا حەيروللاحزادە ۆارزيمەن كۇش سىناستى. ءتورت مينۋتقا سوزىلعان بەلدەسۋ قورىتىندىسى بويىنشا قازاقستاندىق سپورتشى يۋكو باعاسىمەن باسىم ءتۇسىپ، V ازيا پارا ويىندارىنىڭ چەمپيونى اتاندى.
قازىر ۇلتتىق قۇرامانىڭ قورجىنىندا 36 مەدال بار. ونىڭ 10-ى – التىن، 10-ى – كۇمىس، 16-سى – قولا.
قازاقستان قۇراماسىنىڭ بۇعان دەيىنگى ۇزدىك ناتيجەسى 2023 جىلى قىتايدىڭ حانچجوۋ قالاسىندا وتكەن IV ازيا پارا ويىندارىندا تىركەلگەن ەدى. سول كەزدە وتاندىق سپورتشىلار 8 التىن، 12 كۇمىس جانە 21 قولا مەدال جەڭىپ الىپ، جالپى سانى 41 جۇلدەگە قول جەتكىزگەن.
