ۆلاديمير زەلەنسكي ۋكراينالىق سكەلەتونشى ۆلاديسلاۆ گەراسكەۆيچءتى ەلدەگى جوعارى مەملەكەتتىك ماراپاتتاردىڭ ءبىرى – «بوستاندىق» وردەنىمەن ناگرادتادى، دەپ حابارلايدى "ادىرنا" ۇلتتىق پورتالى.
بۇل شەشىم سپورتشى 2026 جىلعى قىسقى وليمپيادا ويىندارى جارىسىنا قاتىسۋدان شەتتەتىلگەننەن كەيىن قابىلداندى. بۇعان دەيىن گەراسكەۆيچ جارىس كەزىندە شلەمىن شەشۋدەن باس تارتقان. سپورتتىق باس كيىمدە رەسەيدىڭ ۋكرايناعا قارسى سوعىسى باستالعالى قازا تاپقان 20-دان استام ۋكراين سپورتشىسىنىڭ پورترەتتەرى بەينەلەنگەن.
حالىقارالىق بوبسلەي جانە سكەلەتون فەدەراتسياسى بۇل ارەكەتتى ەرەجە بۇزۋ دەپ باعالاپ، سپورتشىنى جارىسقا جىبەرمەدى.
ۋكراينا پرەزيدەنتى سپورتشىعا ۇستانىمى مەن باتىلدىعى ءۇشىن العىس ءبىلدىردى. زەلەنسكيدىڭ ايتۋىنشا، قازا تاپقانداردى ەسكە الۋ – ەرەجە بۇزۋ ەمەس، ار-نامىس ماسەلەسى.
ايتا كەتەيىك، بۇعان دەيىن ۋكراينالىق سكەلەتونشى ۆلاديسلاۆ گەراسكەۆيچ يتاليادا ءوتىپ جاتقان وليمپيادا ويىندارىندا العاشقى جارىس الدىندا شەتتەتىلگەنى تۋرالى حابارلاعان ەدىك.
