جاپونيانىڭ ايتي پرەفەكتۋراسى مەن ناگويا قالاسىندا ءوتىپ جاتقان 2026 جىلعى ازيا ويىندارىندا جەتىنشى جارىس كۇنى اياقتالدى. 26 قىركۇيەكتەگى جارىستاردىڭ قورىتىندىسى بويىنشا قازاقستان سپورتشىلارى بەس قولا مەدال جەڭىپ الدى، دەپ حابارلايدى "ادىرنا".
وسىلايشا، جەتى جارىس كۇنىنەن كەيىن قازاقستان قۇراماسىنىڭ قورجىنىندا 35 جۇلدە بار. ونىڭ 8-ءى التىن، 8-ءى كۇمىس جانە 19-ى قولا مەدال. قازاقستان جالپىكوماندالىق ەسەپتە بەسىنشى ورىندا كەلەدى.
كۇننىڭ نەگىزگى جۇلدەلەرىنىڭ ۇشەۋى ەسكەك ەسۋ جانە كانوەدە ەسۋ باعدارلاماسىنان ءتۇستى.
500 مەترگە بايداركامەن جارىسۋدان ايەلدەر اراسىنداعى فينالدا ستەللا سۋحانوۆا مارەگە ءۇشىنشى بولىپ جەتتى. ول قاشىقتىقتى 1 مينۋت 59,688 سەكۋندتا اياقتادى. بۇل – سپورتشىنىڭ وسى ازيا ويىندارىنداعى ەكىنشى قولا مەدالى. بۇعان دەيىن سۋحانوۆا بايداركاداعى تورتتىك قۇرامىندا دا ءۇشىنشى ورىن العان ەدى.
وسى قاشىقتىقتاعى ەرلەر اراسىنداعى باسەكەدە دميتري حولموگوروۆ قولا جۇلدەگە يە بولدى. قازاقستاندىق سپورتشىنىڭ ناتيجەسى – 1 مينۋت 44,453 سەكۋند. التىندى وزبەكستان وكىلى شاحريەر ماحكاموۆ، كۇمىستى وڭتۇستىك كورەيا سپورتشىسى دجان سان ۆون الدى.
ارالاس كانوە ەكيپاجدارىنىڭ 500 مەترلىك جارىسىندا سەرگەي ەمەليانوۆ پەن رۋفينا يسكاكوۆا قازاقستان قورجىنىنا تاعى ءبىر قولا مەدال قوستى. ولار فينالدى 1:51.124 ناتيجەسىمەن ءۇشىنشى بولىپ اياقتادى. بۇل سايىستا قىتاي التىن، ال وزبەكستان كۇمىس مەدال جەڭىپ الدى.
وق اتۋدان قازاقستان ايەلدەر قۇراماسى دا جۇلدەگە قول جەتكىزدى. 50 مەتر قاشىقتىقتان ۆينتوۆكامەن ءۇش پوزيتسيادا اتۋ بويىنشا كوماندالىق جارىستا ارينا مالينوۆسكايا، سوفيا شۋلجەنكو جانە ەليزاۆەتا بەزرۋكوۆا 1754 ۇپاي جيناپ، ءۇشىنشى ورىن الدى. التىن قىتاي قۇراماسىنا، كۇمىس ءۇندىستان كومانداسىنا بۇيىردى. سونىمەن قاتار ارينا مالينوۆسكايا جەكە سايىستا فينالعا ءوتىپ، التىنشى ورىنعا تۇراقتادى.
قازاقستاننىڭ بەسىنشى قولا جۇلدەسىن سەمسەرلەسۋشىلەر يەلەندى. ەرلەر كوماندالىق سايىسىندا نازارباي ساتتارحان، ارتەم ساركيسيان، قۋانىش ەرگاشباي جانە نۇرمۇحاممەد جايلىباي شيرەك فينالدا قىتاي قۇراماسىن 45:40 ەسەبىمەن جەڭدى. جارتىلاي فينالدا ولار جاپونياعا 34:45 ەسەبىمەن ەسە جىبەرىپ، جارىستى قولا مەدالمەن اياقتادى. ارتەم ساركيسيان ءۇشىن بۇل – ازيا ويىندارىنداعى ەكىنشى جۇلدە. ول بۇعان دەيىن جەكە سايىستا دا قولا مەدال العان بولاتىن.
قازاقستاندىق ولگا شمەلەۆا مەن ارتەم تەرەششەنكو جۇلدەگە ءسال عانا جەتپەي قالدى. ارالاس بايداركا-ەكىلىك قۇرامالارى اراسىنداعى 500 مەترلىك فينالدا ولار 1:41.272 ناتيجە كورسەتىپ، ءتورتىنشى ورىنعا يە بولدى.
بوكسشىلار اراسىندا ماحمۇد سابىرحان مەن نۇربەك ورالباي كەلەسى كەزەڭگە ءوتتى. 55 كەلىگە دەيىنگى سالماقتا سىنعا تۇسكەن سابىرحان 1/8 فينالدا يران وكىلى مەحدي كازەميدەن باسىم ءتۇستى. جەكپە-جەك كەزىندە قازاقستاندىق بوكسشى قارسىلاسىن ەكى رەت نوكداۋنعا ءتۇسىردى.
ال 90 كەلىگە دەيىنگى سالماقتا نۇربەك ورالباي اۋعانستان سپورتشىسى سيلاب نۋريمەن كەزدەستى. تورەشىلەردىڭ ءبىراۋىزدى شەشىمىمەن 5:0 ەسەبىندە جەڭىسكە جەتكەن ورالباي دا شيرەك فينالعا جولداما الدى.
قازاقستاندىق بوكسشى ۆيكتوريا گرافەەۆا ءۇشىن جارىس اياقتالدى. 60 كەلىگە دەيىنگى سالماقتاعى 1/8 فينالدا ول قىتايلىق تايبەي وكىلى، وليمپيادا چەمپيونى لين يۋيتينگە 2:3 ەسەبىمەن جول بەردى. جەڭىمپاز تورەشىلەردىڭ بولىنگەن شەشىمىمەن انىقتالدى.
جەڭىل اتلەتيكادان قازاقستان نامىسىن قورعاعان شادراك كوەچ ەرلەر مارافونىندا جەتىنشى ورىن الدى. ول 42,195 شاقىرىمدى 2 ساعات 14 مينۋت 07 سەكۋندتا جۇگىرىپ ءوتتى جانە جارىستى ۇزدىك وندىقتىڭ قاتارىندا اياقتادى.
اۋىر اتلەتيكادان 75 كەلىگە دەيىنگى سالماقتا ونەر كورسەتكەن بەكسۇلتان ايتباي جەتىنشى ورىنعا تۇراقتادى. قازاقستاندىق سپورتشى جۇلقا كوتەرۋدە 135 كەلى، سەرپە كوتەرۋدە 177 كەلى كوتەرىپ، قوس سايىس قورىتىندىسىندا 312 كەلى ناتيجەگە قول جەتكىزدى.
