قىتايدا ءوتىپ جاتقان ءحىح جازعى ازيا ويىندارىندا قازاقستان قۇراماسى 31-ءشى جۇلدەنى قانجىعالادى، دەپ حابارلايدى “ادىرنا”.
1 قازان، جەكسەنبىنىڭ تاڭىندا جەڭىل اتلەتيكادان قازاقستاندىق ولگا سافرونوۆا فينالعا ءوتتى. قر تۋريزم جانە سپورت مينيسترلىگىنىڭ مالىمەتىنە سۇيەنسەك، و. سافرونوۆا 200 مەتر قاشىقتىقتى 22.79 سەكۋندتا جۇگىرىپ ءوتىپ، فينالعا 4-ءشى ناتيجەمەن شىقتى.
ازيا ويىندارىندا بايداركا جانە كانوە ەسۋدەن قازاقستان قۇراماسىنىڭ مۇشەلەرى فينالعا جولداما الدى. اتاپ ايتقاندا، 200 مەتر قاشىقتىققا كانوەدە ەسۋدەن ماريا بروۆكوۆا 52.530 ۋاقىتپەن ىرىكتەۋ كەزەڭىندە 1-ورىن الىپ، فينالعا شىقتى. 500 مەتر قاشىقتىققا بايداركادا ەسۋدەن اناستاسيا بەرەزوۆسكايا 2:06.783 ۋاقىتپەن 2-ورىنعا تۇراقتاپ، اقتىق كەزەڭگە ءوتتى.
ستەند اتۋدان تراپ باعدارلاماسى بويىنشا كوماندالىق سايىستا قازاقستاننىڭ ايەلدەر قۇراماسى 3-ورىنعا يە بولىپ، قولا مەدالدى قانجىلادى.
قازاقستاندىق بەكادىل شايمەردەنوۆ كۇرەس سپورتىنىڭ قۇراش تۇرىنەن كۇمىس مەدال جەڭىپ الدى. 81 كەلىگە دەيىنگى سالماق دارەجەسىندەگى فينالدىق بەلدەسۋدە وتانداسىمىز وزبەكستاندىق ءۇميد ەسانوۆقا ەسە جىبەرىپ الدى.
ستەند اتۋ بويىنشا قازاقستان كومانداسىنىڭ وكىلى ماريا دميتريەنكو حانچجوۋدا ءوتىپ جاتقان ازيا ويىندارىندا ءۇشىنشى ورىن يەلەندى. ول تراپ ساناتىندا 34 ۇپاي جيناپ، «قولانى» ولجالادى.
تۋريزم جانە سپورت مينيسترلىگىنىڭ مالىمەتىنشە، بوكستان 1/2 فينالدا قازاقستاندىق سپورتشى ساعىندىق توعامباي «قولاعا» قاناعات ەتتى.
ال ناتاليا بوگدانوۆا 66 كەلىگە دەيىنگى سالماق دارەجەسىنىڭ شيرەك فينالىندا موڭعوليا وكىلى تسەتسەگداري مياگمارسۋرەنمەن جۇدىرىقتاسىپ، تورەشىلەردىڭ ءبىراۋىز شەشىمىمەن جەڭىسكە جەتتى.
XIX جازعى ازيا ويىندارىندا سۋ دوبىنان قازاقستان ايەلدەر قۇراماسى ءتورتىنشى كەزدەسۋىندە وزبەكستاننان باسىم ءتۇسىپ، قولا جۇلدەگە يە بولدى.
وكىنىشكە وراي قىتايدا ءوتىپ جاتقان ازيا ويىندارىنىڭ بوكس تۋرنيرىندە قازاقستان قۇراماسىنان ەرتۋعان زەينۋللينوۆ جارىس جولىن اياقتادى.
ەسكە سالايىق، حانچجوۋدا ازيا ويىندارى 23 قىركۇيەك - 8 قازان ارالىعىندا وتۋدە.
ايتا كەتەيىك، وسى ۋاقىتتا ەل قۇراماسىندا 31 مەدال بار – 3 التىن، 5 كۇمىس جانە 23 قولا.
