Qytaıda ótip jatqan HIH jazǵy Azııa oıyndarynda Qazaqstan quramasy 31-shi júldeni qanjyǵalady, dep habarlaıdy “Adyrna”.
1 qazan, jeksenbiniń tańynda jeńil atletıkadan qazaqstandyq Olga Safronova fınalǵa ótti. QR Týrızm jáne sport mınıstrliginiń málimetine súıensek, O. Safronova 200 metr qashyqtyqty 22.79 sekýndta júgirip ótip, fınalǵa 4-shi nátıjemen shyqty.
Azııa oıyndarynda baıdarka jáne kanoe esýden Qazaqstan quramasynyń músheleri fınalǵa joldama aldy. Atap aıtqanda, 200 metr qashyqtyqqa kanoede esýden Marııa Brovkova 52.530 ýaqytpen irikteý kezeńinde 1-oryn alyp, fınalǵa shyqty. 500 metr qashyqtyqqa baıdarkada esýden Anastasııa Berezovskaıa 2:06.783 ýaqytpen 2-orynǵa turaqtap, aqtyq kezeńge ótti.
Stend atýdan trap baǵdarlamasy boıynsha komandalyq saıysta Qazaqstannyń áıelder quramasy 3-orynǵa ıe bolyp, qola medaldi qanjylady.
Qazaqstandyq Bekádil Shaımerdenov kúres sportynyń qurash túrinen kúmis medal jeńip aldy. 81 kelige deıingi salmaq dárejesindegi fınaldyq beldesýde otandasymyz ózbekstandyq Úmıd Esanovqa ese jiberip aldy.
Stend atý boıynsha Qazaqstan komandasynyń ókili Marııa Dmıtrıenko Hanchjoýda ótip jatqan Azııa oıyndarynda úshinshi oryn ıelendi. Ol trap sanatynda 34 upaı jınap, «qolany» oljalady.
Týrızm jáne sport mınıstrliginiń málimetinshe, bokstan 1/2 fınalda qazaqstandyq sportshy Saǵyndyq Toǵambaı «qolaǵa» qanaǵat etti.
Al Natalıa Bogdanova 66 kelige deıingi salmaq dárejesiniń shırek fınalynda Mońǵolııa ókili eegdarı Mıagmarsýrenmen judyryqtasyp, tóreshilerdiń biraýyz sheshimimen jeńiske jetti.
XIX jazǵy Azııa oıyndarynda sý dobynan Qazaqstan áıelder quramasy tórtinshi kezdesýinde Ózbekstannan basym túsip, qola júldege ıe boldy.
Ókinishke oraı Qytaıda ótip jatqan Azııa oıyndarynyń boks týrnırinde Qazaqstan quramasynan Ertýǵan Zeınýllınov jarys jolyn aıaqtady.
Eske salaıyq, Hanchjoýda Azııa oıyndary 23 qyrkúıek - 8 qazan aralyǵynda ótýde.
Aıta keteıik, osy ýaqytta el quramasynda 31 medal bar – 3 altyn, 5 kúmis jáne 23 qola.
