بۇگىن، 9 قاراشادا پرەزيدەنت قاسىم-جومارت توقاەۆ ازيا ويىندارى جانە ازيا پاراويىندارىنىڭ جەڭىمپازدارى مەن جۇلدەگەرلەرىن ماراپاتتاۋ راسىمىنە قاتىستى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسى جيىندا سويلەگەن سوزىندە قازاقستان سپورتشىلارى جاپونيادا وتكەن حح جازعى ازيا ويىندارى مەن V ازيا پارا ويىندارىندا تاماشا ناتيجە كورسەتىپ، ەلىمىزدىڭ مارتەبەسىن اسىرعانىن ايتتى.
«بۇل – مەملەكەتىمىز ءۇشىن شىن مانىندە ۇلكەن جەتىستىك جانە زور ماقتانىش! بارشاڭىزعا جارقىن جەڭىستەرىڭىز قۇتتى بولسىن دەيمىن! سىزدەر قۇرلىقتىڭ ەڭ مىقتى سپورتشىلارى قاتىسقان ءدۇبىرلى دودا كەزىندە ەل نامىسىن قورعاپ، جۇزدەن جۇيرىك شىقتىڭىزدار! ۇلتتىق قۇرامانىڭ تاباندى ەڭبەگىنىڭ ارقاسىندا ازيادا تورىندە رۋحتى ءانۇرانىمىز شىرقالدى، كوك تۋىمىز بيىكتە جەلبىرەدى. مەن ءاربىر جەڭىستى ناعىز ءپاتريوتيزمنىڭ ايقىن كورىنىسى دەپ سانايمىن. تۇتاس حالقىمىز سىزدەرگە قولداۋ كورسەتتى، جانكۇيەر بولدى. ءار سپورتشىنىڭ ەل قورجىنىنا قوسقان مەدالى ازاماتتارىمىزعا، اسىرەسە، ءوسىپ كەلە جاتقان جاس بۋىنعا ۇلكەن شابىت بەرەدى، ولاردى مىقتى، كۇشتى بولۋعا ۇندەيدى جانە العا جەتەلەيدى. بۇگىن وسى مەرەيلى ساتتە مەن مەملەكەت باسشىسى رەتىندە بارشاڭىزعا تاعى دا شىنايى ريزاشىلىعىمدى بىلدىرەمىن»،– دەدى پرەزيدەنت.
قاسىم-جومارت توقاەۆ سوڭعى جىلدارى ەلىمىزدىڭ ەكونوميكاسى ايتارلىقتاي نىعايىپ، جاڭا دامۋ كورسەتكىشتەرىنە قول جەتكىزە باستاعانىن تىلگە تيەك ەتتى.
«حالىقارالىق ۆاليۋتا قورىنىڭ بولجامى بويىنشا مەملەكەتىمىزدىڭ جالپى ىشكى ءونىمىنىڭ كولەمى 398 ميلليارد دوللارعا جاقىندايدى. بۇل – ءبىزدىڭ ايماعىمىزداعى ەڭ جوعارى كورسەتكىش بولماق. بىراق قازىرگىدەي قۇبىلمالى ۋاقىتتا، ارينە، قولدا بار تابىسقا ءماز بولىپ، جايباراقات وتىرۋعا بولمايدى. ءبارىمىز وسىنداي الماعايىپ زاماندا ەلىمىزدىڭ الەۋەتىن ارتتىرا ءتۇسۋ ءۇشىن بەلسەندى ءارى قاجىرلى ەڭبەك ەتۋىمىز كەرەك»،– دەدى ول.
