فوتو: "قايرات" فك
الماتىلىق «قايرات» فۋتبول كلۋبى ۋەفا كونفەرەنتسيالار ليگاسىنىڭ جالپى كەزەڭىندەگى ءۇشىنشى تۋردا يتاليانىڭ «اتالانتا» كومانداسىمەن 1:1 ەسەبىمەن تەڭ ءتۇستى. 5 قاراشادا بەرگامو قالاسىندا وتكەن كەزدەسۋدە قازاقستاندىق كلۋب جەڭىسكە جاقىن بولعانىمەن، ويىن سوڭىنا قاراي الاڭ يەلەرى ەسەپتى تەڭەستىرىپ ۇلگەردى.
كەزدەسۋدىڭ العاشقى مينۋتتارىندا «قايرات» بەلسەندى ويىن كورسەتىپ، ەكى رەت بۇرىشتاما دوبىن ورىندادى. الايدا بىرتىندەپ باسىمدىق «اتالانتا» ويىنشىلارىنا اۋىستى. يتاليالىق كلۋب بىرنەشە قاۋىپتى شابۋىل ۇيىمداستىرعانىمەن، الماتىلىقتاردىڭ قاقپاشىسى تەمىرلان اناربەكوۆ سەنىمدى ويىن كورسەتتى. اسىرەسە 31-مينۋتتا ماريو ءپاشاليچتىڭ سوققىسىنان كەيىن قازاقستاندىق كوماندانى گولدان ساقتاپ قالۋعا مۇمكىندىك بولدى.
ەكىنشى تايمدا «قايرات» قارسى شابۋىلدىڭ ناتيجەسىندە ەسەپ اشتى. 53-مينۋتتا ەدميلسوننىڭ پاسىنان كەيىن مارك گۋال قاقپاشىمەن بەتپە-بەت شىعىپ، دوپتى قاقپاعا ءدال باعىتتادى. وسىلايشا الماتىلىق كلۋب 1:0 ەسەبىمەن العا شىقتى.
جاۋاپ گولىن ىزدەگەن «اتالانتا» شابۋىلدى كۇشەيتىپ، بىرنەشە ويىنشىنى الماستىردى. تەمىرلان اناربەكوۆ قارسىلاستىڭ بىرقاتار قاۋىپتى سوققىسىن قايتارعانىمەن، 82-مينۋتتا يتاليالىقتار ەسەپتى تەڭەستىردى. بۇرىشتاما دوبىنان كەيىن رەليا ءوبريچتىڭ پاسىن نيكولا كرستوۆيچ ءساتتى پايدالانىپ، دوپتى قاقپاعا ەنگىزدى.
قالعان ۋاقىتتا قوس كوماندا دا ەسەپتى وزگەرتە المادى. ناتيجەسىندە كەزدەسۋ 1:1 ەسەبىمەن اياقتالدى.
ماتچتان كەيىن «قايرات» كومانداسىنىڭ باس باپكەرى مىندەتىن اتقارۋشى جورا ارۋتيۋنيان فۋتبولشىلاردىڭ ونەرىنە جوعارى باعا بەردى.
«ەموتسيا وتە كوپ. ەڭ الدىمەن بارلىق فۋتبولشىعا العىس ايتقىم كەلەدى. بۇل، ەڭ الدىمەن، ولاردىڭ جەڭىسى»، – دەدى مامان.
ونىڭ ايتۋىنشا، كوماندا جەڭىسكە جەتۋ ءۇشىن كەيبىر ويىن ەپيزودتارىندا دالىرەك شەشىم قابىلداۋى كەرەك ەدى. سونداي-اق ءۇش قورعاۋشىعا نەگىزدەلگەن تاكتيكالىق جۇيە «اتالانتانىڭ» ويىنىن الدىن الا تالداۋ ناتيجەسىندە تاڭدالعان.
ال يتاليالىق كلۋبتىڭ باس باپكەرى ماۋريتسيو سارري كوماندانىڭ كادرلىق ماسەلەلەرىنە توقتالدى. ونىڭ سوزىنشە، «اتالانتانىڭ» 10 فۋتبولشىسى جاراقاتىنا بايلانىستى الاڭعا شىعا الماعان. تاعى ءتورت ويىنشىنىڭ ويىن ۋاقىتىن شەكتەۋگە مەديتسينالىق شتاب كەڭەس بەرگەن.
«ەگەر اقىماق گول جىبەرمەگەنىمىزدە، جەڭىسكە جەتۋىمىز مۇمكىن ەدى. بىراق ءبىز بەرىلمەدىك»، – دەدى سارري.
بەرگاموداعى تەڭ ويىننان كەيىن «قايرات» ءۇش تۋردا ەكى ۇپاي جيناپ، 36 كوماندا اراسىندا 27-ورىنعا جايعاستى. الماتىلىق كلۋب ازىرگە پلەي-وفف كەزەڭىنە جولداما بەرەتىن ۇزدىك 24 كوماندانىڭ قاتارىنا كىرگەن جوق.
ەسكە سالايىق، ءتۋرنيردىڭ العاشقى تۋرىندا قازاقستاندىق كوماندا لاتۆيانىڭ «ريگا» كلۋبىمەن 1:1 ەسەبىمەن تەڭ ويناسا، ەكىنشى تۋردا ءوز الاڭىندا گرەكيانىڭ «پاناتينايكوس» كومانداسىنا 1:5 ەسەبىمەن ەسە جىبەرگەن بولاتىن.
ال «اتالانتا» ءۇش ويىننان كەيىن ءتورت ۇپاي جيناپ، 16-ورىندا تۇر.
«قايرات» كەلەسى كەزدەسۋىن 26 قاراشا كۇنى الماتىدا شۆەتسيانىڭ «مەلبيۋ» كلۋبىنا قارسى وتكىزەدى. بۇدان كەيىن قازاقستاندىق كوماندا رۋمىنيانىڭ «ۋنيۆەرسيتاتيا» جانە نيدەرلاندتىڭ «تۆەنتە» كلۋبتارىمەن كەزدەسەدى.
الماتىلىق كلۋب ءۇشىن الداعى ويىندار پلەي-وفف كەزەڭىنە شىعۋ مۇمكىندىگىن ساقتاپ قالۋ تۇرعىسىنان ماڭىزدى بولماق.
