فۋتبولدان قازاقستان قۇراماسىنىڭ باس باپكەرى ماگومەد اديەۆ رەسەيدىڭ «احمات» (گروزنىي) كلۋبىنىڭ باس باپكەرلىگىنە تاعايىندالدى. بۇل قازاقستاندىق فۋتبول ارداگەرىنىڭ شامىنا ءتيدى، دەپ حابارلايدى “ادىرنا” ۇلتتىق پورتالى.
اديەۆتىڭ رەسەي كلۋبىنا باپكەرلىك قىلاتىنى 5 ساۋىردە بەلگىلى بولدى.
ارادا از وتكەندە قازاقستاندىق فۋتبول ارداگەرى يۋسۋپ شاديەۆ Sports.kz سايتىنا ماگومەد اديەۆتىڭ رەسەيلىك «احمات» كومانداسىنىڭ باس باپكەرى قىزمەتىنە تاعايىندالۋى تۋرالى پىكىرىمەن ءبولىستى.
«احماتتا» وعان وتە قيىن بولادى. كوماندا قاۋىپتى ايماقتا ورنالاسقان رپل-دا وتە قيىن جاعدايدا تۇر. چەمپيوناتتىڭ اياقتالۋىنا كوپ راۋندتار قالدى جانە قازىر ونداعى ءاربىر ماتچ التىنمەن باعالانادى. RPL دەڭگەيى وتە جاقسى، وندا كوپ ساپالى ويىنشىلار بار. بارلىق كوماندا ويناۋدا، ءتىپتى سوڭعى ورىندا تۇرعان سوچي دە. مەنىڭشە، وعان بىرەۋىن تاڭداعانى دۇرىس سياقتى – نە كلۋبتا، نە قازاقستان قۇراماسىندا جۇمىس ىستەۋ. وسىنداي جاۋاپكەرشىلىك جۇگى استىندا ەكى مايداندا جۇمىس ىستەۋ وتە قيىن»، - دەيدى ول.
بۇدان الدىن «احمات» كلۋبىنىڭ پرەزيدەنتى ماگومەد داۋدوۆ تەلەگرام-كانالىندا «شەشەن فۋتبولىنىڭ تۇلەگى، ويىنشى رەتىندە ول ءوزىنىڭ تۋعان كلۋبىمەن رەسەي كۋبوگىن جەڭىپ الدى جانە جاتتىقتىرۋشىلىق مانسابىندا ءار ۋاقىتتا كوماندانىڭ شتاب-پاتەرىندە بولدى. سوڭعى جىلدارى ءبىز ماماننىڭ قازاقستان قۇراماسىنىڭ باس باپكەرى رەتىندەگى جەتىستىگىنە قۋاندىق. ولار اديەۆتىڭ باسشىلىعىمەن تاريحىنداعى ەڭ جاقسى ناتيجەلەرگە قول جەتكىزدى. ماگومەد «احماتتى» باسقارۋ ۇسىنىسىنا قۋانا كەلىستى. ونىڭ تاجىريبەسى، كاسىبي جانە ادامي قاسيەتتەرى ۇجىم الدىندا تۇرعان ماسەلەلەردى شەشۋگە مۇمكىندىك بەرەتىنىنە سەنىمدىمىن»، - دەپ جازعان.
4 ساۋىردە «احمات» كلۋبى ميروسلاۆ روماششەنكو باس باپكەر قىزمەتىنەن كەتكەنىن حابارلادى.
بىراق اديەۆتىڭ 2024 جىلدىڭ سوڭىنا دەيىن قازاقستان قۇراماسىمەن كەلىسىمشارتى بار. 46 جاستاعى رەسەيلىك باپكەر ەكى جاققا دا باپكەرلىك جاساماق.
7 ءساۋىر كۇنى گروزنىيدىڭ «احماتى» رەسەي چەمپيوناتىنىڭ 23-ءشى تۋرىنداعى ماسكەۋلىك «لوكوموتيۆتەن» 0:2 ەسەبىمەن جەڭىلىپ قالدى. بۇل ماتچ ماگومەد اديەۆ "احماتكە" باپكەر بولىپ تاعايىندالعاننان كەيىنگى العاشقى كەزدەسۋ بولدى.
باپكەر اديەۆ “احماتتاعى” دەبيۋتتىك ماتچ تۋرالى پىكىر ءبىلدىردى.
«بۇگىنگى ويىندا توزە المادىق. ءبىزدىڭ جەڭىلىسكە لايىق. قارسىلاس بىزدەن جوعارى، جىلدام، ۇتقىر بولدى. ءبىز ءوز دەڭگەيىمىزگە جەتۋ ءۇشىن كوپ جۇمىس ىستەۋىمىز كەرەك»، - دەدى ول Match TV ارناسىندا.
ايتا كەتەيىك، ماگومەد اديەۆ قازاقستان قۇراماسىنا 2022 جىلدىڭ ءساۋىر ايىنان بەرى باپكەرلىك قىلىپ كەلەدى. ەۆرو-2024 سوڭعى ىرىكتەۋ كەزەڭىندە ۇلتتىق قۇراما ەۋروپا چەمپيوناتىنا جولداماعا تالاستى، الايدا شەشۋشى ماتچتا سلوۆەنيادان ۇتىلدى (1:2).
