بۇگىن، 26 تامىزدا مەملەكەت باسشىسى قاسىم-جومارت توقاەۆ رەسپۋبليكالىق تامىز كونفەرەنتسياسىنىڭ پلەنارلىق وتىرىسىندا ءسوز سويلەدى، دەپ حابارلايدى «ادىرنا» ءتىلشىسى.
«بۇگىنگى جيىنعا قازاقستاننىڭ بارلىق ايماعىنان ۇلاعاتتى ۇستازدار ارنايى كەلىپ وتىر. مىقتى مۇعالىم – ساپالى ۇلتتىڭ تىرەگى، بۇل – ناعىز اقيقات. بۇگىن وتە ۇتىمدى، مازمۇندى باياندامالاردى تىڭدادىق، ءتيىمدى پىكىرلەر مەن ۇسىنىستار ايتىلدى. ءسوز سويلەگەن ۇستازدارعا، بۇكىل مۇعالىمدەر قاۋىمىنا ريزاشىلىعىمدى، ءىلتيپاتىمدى بىلدىرەمىن. ۇستازدى ۇلىقتاعان ەلدىڭ كەلەشەگى جارقىن بولارى ايدان انىق. سىزدەر جاس بۋىنعا تەرەڭ ءبىلىم بەرىپ، سانالى، وزىق ويلى جانە وتانشىل ۇرپاق تاربيەلەۋگە زور ەڭبەك ءسىڭىرىپ جۇرسىزدەر. وسىلايشا، باسەكەگە قابىلەتتى ۇلت قالىپتاستىرۋعا اتسالىسىپ كەلەسىزدەر»،– دەدى ول.
پرەزيدەنتتىڭ سوزىنشە، ەلىمىزدە «پەداگوگ مارتەبەسى تۋرالى» زاڭ قابىلدانىپ، بيىل وعان ۇستازدارعا قوسىمشا قۇقىقتىق جانە الەۋمەتتىك كەپىلدىكتەر بەرەتىن وزگەرىستەر ەنگىزىلگەن. سونداي-اق 5 قازان رەسمي تۇردە مۇعالىمدەر كۇنى رەتىندە بەكىتىلگەن.
توقاەۆ مەملەكەتتىك ماراپاتتار قاتارىنا «قازاقستاننىڭ ەڭبەك سىڭىرگەن ۇستازى» اتاعى ەنگىزىلگەنىن اتاپ ءوتتى. قازىرگى تاڭدا بۇل جوعارى ماراپاتقا 100-گە جۋىق پەداگوگ يە بولعان. سونىمەن قاتار سوڭعى ءۇش جىلدا ءۇش مۇعالىمگە ەڭ جوعارى مەملەكەتتىك ناگرادا – «قازاقستاننىڭ ەڭبەك ەرى» اتاعى بەرىلگەن.
«TALIS-2024 (The OECD Teaching and Learning International Survey) زەرتتەۋىنىڭ ناتيجەسىنە سايكەس، قازاقستان مۇعالىمدەردىڭ بەدەلىن نىعايتۋ كورسەتكىشى جونىنەن ەكىنشى ورىندا تۇر. سونداي-اق ۇستازداردىڭ ەڭبەكاقىعا قاناعاتتانۋ ولشەمى بويىنشا ەلىمىز الەمدەگى العاشقى بەس مەملەكەتتىڭ قاتارىنا كىرەدى. اتاپ ايتقاندا، ۇستازداردىڭ 95 پايىزى ءوز جۇمىسىنا كوڭىلى تولاتىنىن ايتقان. ال 80 پايىزى وسى ماماندىقتى قايتا تاڭداۋعا دايىن ەكەنىن جەتكىزگەن»،— دەدى ول.
