Bügın, 26 tamyzda memleket basşysy Qasym-Jomart Toqaev Respublikalyq tamyz konferensiiasynyŋ plenarlyq otyrysynda söz söiledı, dep habarlaidy «Adyrna» tılşısı.
«Bügıngı jiynǧa Qazaqstannyŋ barlyq aimaǧynan ūlaǧatty ūstazdar arnaiy kelıp otyr. Myqty mūǧalım – sapaly ūlttyŋ tıregı, būl – naǧyz aqiqat. Bügın öte ūtymdy, mazmūndy baiandamalardy tyŋdadyq, tiımdı pıkırler men ūsynystar aityldy. Söz söilegen ūstazdarǧa, bükıl mūǧalımder qauymyna rizaşylyǧymdy, ıltipatymdy bıldıremın. Ūstazdy ūlyqtaǧan eldıŋ keleşegı jarqyn bolary aidan anyq. Sızder jas buynǧa tereŋ bılım berıp, sanaly, ozyq oily jäne otanşyl ūrpaq tärbieleuge zor eŋbek sıŋırıp jürsızder. Osylaişa, bäsekege qabılettı ūlt qalyptastyruǧa atsalysyp kelesızder»,– dedı ol.
Prezidenttıŋ sözınşe, elımızde «Pedagog märtebesı turaly» zaŋ qabyldanyp, biyl oǧan ūstazdarǧa qosymşa qūqyqtyq jäne äleumettık kepıldıkter beretın özgerıster engızılgen. Sondai-aq 5 qazan resmi türde Mūǧalımder künı retınde bekıtılgen.
Toqaev memlekettık marapattar qataryna «Qazaqstannyŋ eŋbek sıŋırgen ūstazy» ataǧy engızılgenın atap öttı. Qazırgı taŋda būl joǧary marapatqa 100-ge juyq pedagog ie bolǧan. Sonymen qatar soŋǧy üş jylda üş mūǧalımge eŋ joǧary memlekettık nagrada – «Qazaqstannyŋ Eŋbek Erı» ataǧy berılgen.
«TALIS-2024 (The OECD Teaching and Learning International Survey) zertteuınıŋ nätijesıne säikes, Qazaqstan mūǧalımderdıŋ bedelın nyǧaitu körsetkışı jönınen ekınşı orynda tūr. Sondai-aq ūstazdardyŋ eŋbekaqyǧa qanaǧattanu ölşemı boiynşa elımız älemdegı alǧaşqy bes memlekettıŋ qataryna kıredı. Atap aitqanda, ūstazdardyŋ 95 paiyzy öz jūmysyna köŋılı tolatynyn aitqan. Al 80 paiyzy osy mamandyqty qaita taŋdauǧa daiyn ekenın jetkızgen»,— dedı ol.
