رەسەي مەن ۋكراينا حەرسون وبلىسىنداعى ولەشكي قالاسىندا گۋمانيتارلىق وپەراتسيا جۇرگىزۋ ءۇشىن ۋاقىتشا اتىستى توقتاتۋعا كەلىستى، دەپ حابارلايدى “ادىرنا”.
كەلىسسوزدەرگە اقش-تىڭ ءبىرىنشى حانىمى مەلانيا ترامپ دەلدال بولعان.
بۇل تۋرالى 23 قازاندا اق ءۇي مالىمدەدى.
ۋاقىتشا ءبىتىم اياسىندا قالاعا ازىق-تۇلىك، ءدارى-دارمەك پەن اۋىزسۋ جەتكىزۋ، بەيبىت تۇرعىنداردىڭ قاۋىپسىز جەرگە كوشىرىلۋىن ۇيىمداستىرۋ جوسپارلانعان.
اق ءۇيدىڭ مالىمەتىنشە، گۋمانيتارلىق وپەراتسيا 29 قازاندا باستالۋى ءتيىس. الايدا رەسەي قارۋلى كۇشتەرى باس شتابىنىڭ باسشىسى ۆالەري گەراسيموۆ حەرسون باعىتىندا 27 قازاننان باستاپ اتىستى توقتاتۋ رەجيمى ەنگىزىلەتىنىن ايتتى. ۋكراينا اسكەري كۇشتەرى دە وسى كۇندى راستاعان.
مەلانيا ترامپتىڭ ايتۋىنشا، ول ماسكەۋ جانە كيەۆ وكىلدەرىمەن كەلىسسوزدەر جۇرگىزۋگە تىكەلەي قاتىسىپ، اتىستى توقتاتۋ شارتتارىن، مەرزىمدەرىن جانە گۋمانيتارلىق كومەكتى جەتكىزۋ ءتارتىبىن كەلىسۋگە اتسالىسقان.
اقش-تىڭ ءبىرىنشى حانىمى ولەشكيدەگى جاعدايدىڭ كۇردەلى ەكەنىن اتاپ ءوتتى. ونىڭ سوزىنشە، قالادا قالعان تۇرعىنداردىڭ باسىم بولىگى – قارت ادامدار. ولارعا مەديتسينالىق كومەك، ءدارى-دارمەك، ازىق-تۇلىك جانە تازا اۋىزسۋ قاجەت. سونىمەن قاتار قالادا ەلەكترمەن جابدىقتاۋ جۇيەسى قالىپتى جۇمىس ىستەمەيدى، جولدار مينالانعان، ال اتقىلاۋ جالعاسىپ جاتىر.
ۋاقىتشا ءبىتىم كەزىندە رەسەي مەن ۋكراينا تاراپتارىنىڭ ازاماتتىق وكىلدەرى جەرگىلىكتى تۇرعىنداردىڭ قاجەتتىلىكتەرىن انىقتاپ، قانداي كومەك كەرەگىن باعالاۋى ءتيىس.
ۋكراينا پرەزيدەنتىنىڭ كوممۋنيكاتسيالار جونىندەگى كەڭەسشىسى دميتري ليتۆين گۋمانيتارلىق وپەراتسياعا قاتىستى ماسەلەلەرمەن جوعارعى رادانىڭ ادام قۇقىقتارى جونىندەگى ۋاكىلى دميتري لۋبينەتس اينالىسىپ جاتقانىن ايتتى.
رەسەي باس شتابىنىڭ باسشىسى ۆالەري گەراسيموۆتىڭ مالىمدەۋىنشە، ماسكەۋ ۋاقىتىمەن 27 قازان ساعات 04:00-دەن باستاپ حەرسون باعىتىندا اتىستى توقتاتۋ جوسپارلانعان. گۋمانيتارلىق كومەك جەتكىزىلمەس بۇرىن ماماندار جولداردى تەكسەرىپ، ينجەنەرلىك بارلاۋ جۇرگىزىپ، گۋمانيتارلىق كولوننانىڭ قاۋىپسىز ءوتۋىن قامتاماسىز ەتۋى ءتيىس.
