رەسەيدىڭ سانكت-پەتەربۋرگ قالاسىندا 7 جاستاعى بالا كوپقاباتتى ءۇيدىڭ 7-قاباتىنان قۇلاپ كەتكەن. ونى دەر كەزىندە بايقاعان اۋلا سىپىرۋشى قاعىپ الىپ، ءومىرىن ساقتاپ قالعان، دەپ حابارلايدى "ادىرنا" ۇلتتىق پورتالى.
وقيعا پەتروزاۆودسكايا كوشەسىندە بولعان. اۋتيزم دياگنوزى بار بالا پلانشەتپەن ويناپ وتىرعان كەزدە، اناسى باسقا بولمەدە بولعان. سول ساتتە بالا تەرەزەگە شىعىپ كەتكەن.
كۋاگەرلەردىڭ ايتۋىنشا، كوممۋنالدىق قىزمەتكەر بالانىڭ قاۋىپتى جاعدايدا تۇرعانىن بايقاپ، تومەندە تۇرىپ ونى قۇتقارۋعا ارەكەت جاساعان. بالا قولى تايىپ، تومەن قاراي قۇلاعان كەزدە، ەر ادام ونى باسىمەن قۇلاپ بارا جاتقان كۇيىندە ۇستاپ قالعان.
وقيعا سالدارىنان بالا اياعىن سىندىرعان، ال ونى قۇتقارعان ەر ادامنىڭ قابىرعالارى سىنعان. ەكەۋى دە اۋرۋحاناعا جەتكىزىلدى.
انىقتالعانداي، بالا ءومىرىن 37 جاستاعى وزبەكستان ازاماتى حايرۋللو يبادۋللاەۆ ساقتاپ قالعان.
وسى ەرلىگى ءۇشىن وزبەكستان پرەزيدەنتى شاۆكات ميرزيوەۆ ونى «جاسورات» مەدالىمەن ماراپاتتاۋ تۋرالى جارلىققا قول قويدى. پرەزيدەنت باتىرلىق پەن جانقيارلىق تانىتقان وتانداسىنىڭ ەرلىگىن ەرەكشە اتاپ ءوتتى.
