فوتو:antikor.info
ازەربايجان، تۇركيا جانە وزبەكستان اسكەري قىزمەتشىلەرىنىڭ قاتىسۋىمەن «بىرلىك كۇشى – 2026» اتتى بىرلەسكەن اسكەري وقۋ-جاتتىعۋ وتەدى. بۇل تۋرالى ازەربايجان قورعانىس مينيسترلىگى مالىمدەدى, دەپ حابارلايدى "ادىرنا".
وقۋ-جاتتىعۋ ءۇش كەزەڭنەن تۇرادى. اسكەري مانەۆرلەر ازەربايجانداعى قاراباق ەكونوميكالىق اۋدانىنداعى قىزىلكايا وقۋ-جاتتىعۋ ورتالىعىندا، ناحچىۆان اۆتونوميالىق رەسپۋبليكاسىنداعى قاراباعلار وقۋ-جاتتىعۋ ورتالىعىندا جانە ازەربايجاننىڭ كاسپي تەڭىزىندەگى اۋماقتىق سۋلارىندا ورنالاسقان بۇيۇك-زيرا پوليگونىندا ۇيىمداستىرىلادى.
مانەۆرلەرگە ءۇش ەلدىڭ اسكەري قىزمەتشىلەرىمەن قاتار جاۋىنگەرلىك تەحنيكا، تەڭىز جانە اۋە كولىكتەرى، سونداي-اق ۇشقىشسىز ۇشۋ اپپاراتتارى تارتىلادى.
ازەربايجان قورعانىس مينيسترلىگىنىڭ حابارلاۋىنشا، وقۋ-جاتتىعۋدىڭ نەگىزگى ماقساتى – اسكەري بولىمدەردىڭ بىرلەسكەن وپەراتسيالارعا دايىندىعىن ارتتىرۋ، ءوزارا ءىس-قيمىلدى جەتىلدىرۋ جانە اسكەري دايىندىق راسىمدەرىن بىرىزدەندىرۋ. سونىمەن قاتار وقۋ-جاتتىعۋ بارىسىندا اسكەرلەردىڭ جاڭا جاۋىنگەرلىك مۇمكىندىكتەرىن دامىتۋ كوزدەلگەن.
ۆەدومستۆونىڭ مالىمەتىنشە، تۇركيا قارۋلى كۇشتەرىنىڭ اسكەري قىزمەتشىلەرى مەن اۆياتسيالىق تەحنيكاسى وقۋ-جاتتىعۋعا قاتىسۋ ءۇشىن ازەربايجانعا كەلىپ ۇلگەرگەن.
ازىرگە ازەربايجان تاراپى «بىرلىك كۇشى – 2026» وقۋ-جاتتىعۋىنىڭ ناقتى باستالۋ جانە اياقتالۋ كۇندەرىن جاريالاعان جوق.
