ءزىلزالا زارداپتارىن جويۋعا قازاق ەلىنەن ارنايى اتتانعان قۇتقارۋشىلار جاساعى بۇگىن ەلگە ورالادى. ولار جەر سىلكىنگەن ايماقتاردا ىزدەۋ-قۇتقارۋ جۇمىستارىنا باتىل ارالاستى، جەرگىلىكتى حالىقتىڭ العىسىنا بولەنىپ، ابىروي ارقالاپ كەلە جاتىر، دەپ حابارلايدى "ادىرنا" ۇلتتىق پورتالى.
توتەنشە جاعدايلار مينيسترلىگى ءباسپاسوز قىزمەتىنىڭ مالىمەتىنشە، قۇتقارۋشىلاردىڭ ءبىرىنشى لەگى تۇركيادان الماتى قالاسىنا 2023 جىل، 18 اقپان، ساعات 23.10-دا كەلەدى. قازاق ەلىنىڭ قۇتقارۋشىلارى كۇن-ءتۇن دەمەي كۇشىن سارپ ەتىپ، تۇركيادا ءۇيىندى استىنان 88 ادامنىڭ دەنەسىن شىعاردى جانە 7 ادامدى قۇتقاردى.
تۇركياداعى ازاماتتىق ءىستىڭ باسىندا جۇرگەن قر توتەنشە جاعدايلار ءمينيسترىنىڭ ءبىرىنشى ورىنباسارى يبراحيم كۇلشىمباەۆ مالىمدەمە جاسادى:
- قولىمىزدان كەلگەنشە كۇشىمىزدىڭ ءبارىن سالدىق. كۇن-ءتۇن دەمەي كەزەكشىلىككە ءبولىنىپ قۇتقارۋشىلارىمىز جۇمىس ىستەپ جاتىر. وتە قاۋىپتى جۇمىس ەكەنىن وزدەرىڭىز كورىپ تۇرسىزدار. باسقا مەملەكەتتەردىڭ، وسى تۇرىك ەلىنىڭ قۇتاقرۋشىلارىنىڭ دا جاراقات العانىن كورىپ جاتىرسىزدار. ءتارتىپتىڭ ارقاسىندا وسى جۇمىستى امان-ەسەن اياقتاپ جاتىرمىز، - دەدى مامان.
"ادىرنا" ۇلتتىق پورتالى
