فوتو: Unsplash
رەسەيلىك «ياندەكس» كومپانياسى قازان ايىندا داتا-ورتالىقتارىنا جاسالعان درون شابۋىلدارىنان كەيىن Yandex Cloud بۇلتتى پلاتفورماسىنداعى قولدانۋشىلار دەرەكتەرىنىڭ 2,84%-ىن قالپىنا كەلتىرە الماعانىن مالىمدەدى, دەپ حابارلايدى "ادىرنا".
كومپانيا وكىلدەرىنىڭ حابارلاۋىنشا، اقپاراتتىڭ ءبىر بولىگى جابدىقتاردىڭ قاتتى زاقىمدانۋى مەن رەزەرۆتىك كوشىرمەلەردىڭ بولماۋىنا بايلانىستى ءبىرجولا جوعالعان.
ينجەنەرلەر قولدانۋشىلار دەرەكتەرىنىڭ 97,16%-ىن قالپىنا كەلتىرگەن. ال رەزەرۆتىك كوشىرۋ قىزمەتىن پايدالانعان قولدانۋشىلاردىڭ بارلىق اقپاراتى تولىق ساقتالعان.
وسى جاعدايدان كەيىن «ياندەكس» قاۋىپسىزدىك شارالارىن كۇشەيتۋ تۋرالى شەشىم قابىلدادى. ەندى جاڭا ۆيرتۋالدى ماشينالاردى ىسكە قوسۋ كەزىندە رەزەرۆتىك كوشىرمە جاساۋ فۋنكتسياسى ادەپكى بويىنشا قوسىلاتىن بولادى.
ەسكە سالايىق، قازان ايىنىڭ ورتاسىندا ۋكراينالىق دروندار «ياندەكستىڭ» ۆلاديمير، ريازان وبلىسىنداعى ساسوۆو جانە كالۋگا قالالارىندا ورنالاسقان ءۇش داتا-ورتالىعىنا شابۋىل جاساعان ەدى. سالدارىنان كومپانيانىڭ بىرقاتار تسيفرلىق قىزمەتتەرىندە اۋقىمدى اقاۋلار تىركەلدى.
اتاپ ايتقاندا، «ياندەكس پەي» تولەم پلاتفورماسىنىڭ پايدالانۋشىلارى بەلگىلى ءبىر ۋاقىت ارالىعىندا ءوز قاراجاتىنا قول جەتكىزە الماي، ساتىپ الۋلارعا تولەم جاساۋ، شوتتارىن تولىقتىرۋ جانە اقشا اۋدارۋ كەزىندە قيىندىقتارعا تاپ بولدى. سول كەزدە كومپانيا پايدالانۋشىلاردىڭ قاراجاتى قاۋىپسىز ەكەنىن جانە شوتتار تۋرالى اقپارات بىرنەشە داتا-ورتالىقتا ساقتالعانىن حابارلاعان.
«كوممەرسانت» باسىلىمىنىڭ دەرەككوزدەرى زاقىمدانعان جابدىقتاردى تولىق اۋىستىرۋ شامامەن التى ايعا سوزىلۋى مۇمكىن ەكەنىن ايتقان. ال قولدانۋشىلار دەرەكتەرى مەن سەرۆيستەرىن جەدەل ورنالاستىرۋ ماقساتىندا «ياندەكس» VK Cloud, Selectel جانە K2Cloud بۇلتتى پروۆايدەرلەرىمەن ىنتىماقتاستىق ورناتقان.
