استاناداعى تۇرعىن ۇيلەردىڭ بىرىندە بالتا ۇستاعان ەر ادام تۇرعىنداردىڭ ۇرەيىن تۋعىزدى، دەپ حابارلايدى "ادىرنا" ۇلتتىق پورتالى.
وقيعا تۋرالى كۋاگەرلەر حابارلاپ، بەينەجازبالار الەۋمەتتىك جەلىدە تارادى. الدىن الا مالىمەتتەرگە سايكەس، ماس كۇيدەگى ەر ادام پودەزدە جانجال شىعارىپ، ءبىر ادامعا شابۋىل جاساعان. وقيعا ورنىنان تۇسىرىلگەن بەينەجازبالاردا ونىڭ قولىندا قۇرىلىس قۇرالى بولعانى بايقالادى.
اتالعان جاعدايعا قاتىستى استانا قالالىق پوليتسيا دەپارتامەنتى تۇسىنىكتەمە بەردى. ۆەدومستۆو مالىمەتىنشە، 31 جاستاعى ەر ادام ۇستالىپ، پوليتسيا بولىمىنە جەتكىزىلگەن.
بەلگىلى بولعانداي، ول تانىسىنىڭ پاتەرىندە جوندەۋ جۇمىستارى كەزىندە الكوگول ءىشىپ، كەيىن اگرەسسيۆتى مىنەز-قۇلىق تانىتقان. سول كەزدە قولىنا قۇرىلىس قۇرالىن العان.
پوليتسيا قىزمەتكەرلەرى ونىڭ زاڭعا قايشى ارەكەتتەرىن دەر كەزىندە توقتاتقان. كەيىن پودەزدە جۇرگەن كەزىندە ەر ادام اينەكتى سىندىرىپ، ءوزى جاراقات العان. وعان مەديتسينالىق كومەك كورسەتىلگەن. باسقا ازاماتتار زارداپ شەكپەگەن.
قۇقىق بۇزۋشى قوعامدىق ورىندا ماس كۇيدە بولعانى جانە ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلدى. سوت شەشىمىمەن ول 15 تاۋلىككە اكىمشىلىك قاماۋعا الىنىپ، ارنايى قابىلداۋ ورنىنا قامالدى.
