فوتو: Getty Images
اقش كونگرەسىنىڭ وكىلدەر پالاتاسى قورعانىس ءمينيسترى پيت حەگسەتكە يمپيچمەنت جاريالاۋ تۋرالى قاراردى قاراۋدى كەيىنگە قالدىردى. 10 قاراشادا وتكەن داۋىس بەرۋ كەزىندە 211 كونگرەسسمەن ۇسىنىستى قولداسا، 204-ءى قارسى شىقتى. ناتيجەسىندە قۇجات پالاتاداعى قۇقىقتىق ماسەلەلەر جونىندەگى كوميتەتتىڭ قاراۋىنا جىبەرىلدى، دەپ حابارلايدى Reuters.
اتالعان كوميتەتتى رەسپۋبليكاشىلدار باقىلايتىندىقتان، ءمينيستردى قىزمەتىنەن شەتتەتۋ باستاماسى ازىرگە ءىس جۇزىندە توقتاپ تۇر. بۇل ماسەلە كونگرەستىڭ كەلەسى شاقىرىلىمى جۇمىسىن باستاعانعا دەيىن قارالماۋى مۇمكىن.
جاڭا شاقىرىلىمداعى كونگرەسس 2027 جىلعى 3 قاڭتاردا جۇمىسقا كىرىسەدى. قاراشادا وتكەن ارالىق سايلاۋ قورىتىندىسى بويىنشا دەموكراتيالىق پارتيا وكىلدەر پالاتاسى مەن سەناتتا باسىمدىققا يە بولادى. وسىدان كەيىن دەموكراتتار پيت حەگسەتتى قىزمەتىنەن شەتتەتۋ ماسەلەسىن قايتا كوتەرۋى ىقتيمال.
يمپيچمەنت جاريالاۋ ءۇشىن وكىلدەر پالاتاسىندا جاي كوپشىلىك داۋىسى جەتكىلىكتى. ال سەناتتا ءمينيستردى قىزمەتىنەن بوساتۋ تۋرالى شەشىم قابىلداۋ ءۇشىن سەناتورلاردىڭ ۇشتەن ەكىسى قولداۋى قاجەت. ايتا كەتەيىك، اقش تاريحىندا وسى ۋاقىتقا دەيىن قورعانىس مينيسترىنە يمپيچمەنت جاريالاۋ ارەكەتى بولماعان.
يمپيچمەنت تۋرالى قارار جوباسىن كەنتۋككي شتاتىنان سايلانعان رەسپۋبليكاشىل كونگرەسسمەن توماس ماسسي ۇسىنعان. ول پيت حەگسەتتى وكىلەتتىگىن اسىرا پايدالاندى دەپ ايىپتادى. اتاپ ايتقاندا، كونگرەسسمەن اقش-تىڭ كونگرەسس رۇقساتىنسىز يرانداعى سوعىسقا قاتىسۋىن سىنعا العان.
ءوز كەزەگىندە پيت حەگسەت تاعىلعان ايىپتاردى جوققا شىعارىپ، باستامانى «فارس» دەپ اتادى. پەنتاگونداعى ءباسپاسوز ءماسليحاتىندا مينيستر يرانداعى سوعىسقا قازىرگى قوعامدىق پىكىردەن وزگەشە تاريحي باعا بەرىلەتىنىن مالىمدەدى. ونىڭ ۇستانىمىن اقش پرەزيدەنتى دونالد ترامپ تا قولدادى.
