تۇركيادا قازاق قانداس اعايىندار كوپ قونىستانعان زەيتينبۋرنۋ اۋدانى اكىمدىگىنىڭ “كازلىچەشمە” مادەنيەت سارايىندا 8-ءنشى حالىق ارالىق “كۇزگى ىستانبۇل” فەستيۆالىنىڭ اياسىندا حورەوگرافيالىق بي بايقاۋى وتكىزىلدى.
وعان قازاقستان، وزبەكستان، قىرعىستان ەلدەرىنەن 4 تان 17 جاس ارالىعىنداعى ءبيشى جاس وسپىرىمدەر قاتىستى. شارا قازاقستان حورەوگرافيا بيشىلەر اسسوتسياسى، قازاقستاننىڭ ىستانبۇلداعى باس كونسۋلدىعى قولداۋ كورسەتتى. قازاقستان بي ونەرىنىڭ نەگىزىن قالاۋشى، اتاقتى ءبيشى شارا جيەنقۇلوۆا اپامىزدىڭ ءىز باسارلارى اقتوبە، اتىراۋ، الماتى، تاراز، تالدىقورعان قالالارىنان “نۇر بي ءانسامبىلى، تۇمار، الەم، اقىل سىرى، ايشا ءبيبى، التىن ءدان، تولقىن، قازاق ەلى” اتتى بي انسامبىلدەرى قاتىستى. قازاقتىڭ ۇلتتىق كيىمدەرىن كيگەن، قولدارىندا دومبىرا، ۇستەرىندە قازاقتىڭ ويۋ ورنەكتى كامزولى، باستارىندا ۇكىلى بورىكى بار بۇلدىرشىندەر ۇلتتىق ونەرىمىزدى شەت ەلدە، تۇركيادا جاقسى تانىتتى. مىنە قازاق، مىنە دومبىرا، مىڭ بۇرىلعان بيگە جينالعاندار زور قوشەمەت كورسەتتى. جيىندا قازاقستاننىڭ ەڭبەك سىڭىرگەن قايراتكەرى، دۇنيە ءجۇزى قازاقتارى قاۋىمداستىعىنىڭ تۇركياداعى ۇاكىلى، قازاقستان مادەنيەت جانە ساۋدا ورتادىعى توراعاسىنىڭ ورىنباسارى ەرجان ءۋايىس قۇتتىقتاۋ ءسوز سويلەدى.
قازاق ەلشىسى ەركەبۇلان ساپيەۆتىڭ قۇتتىقتاۋ ءسوزىن جەتكىزدى. بۇل كەزدەسۋ تۇركيا مەمەلەكەتىنىڭ 100 جىلدىعى، قازاقستان مەن تۇركيا بايلانىستارىنىڭ 31 جىلدىعى، “تۇركسوي” دىڭ 30 جىلدىعى قۇرمەتىنە وتكىزىلىپ وتىر. مادەني جانە دوستىق بايلانىستار جان جاقتى دامۋدا، ويتكەنى ءبىز ءتۇبىمىز تۇرىك، ءدىنىمىز، ءدىلىمىز، ادەت عۇرىپ، سالت ءداستۇرىمىز ورتاق. ەندەشە ەكى ەل قاتىناستارى ماڭگى جاسايدى. فەستيۆالدى ۇيىمداستىرۋشىلاردىڭ ءبىرى قازاقستاندىق كاميلا سەيىلحانوۆا جىلى قابىلداۋ ءۇشىن تۇرىك ەلىنە العىسىن ءبىلدىردى.
قازىلار القاسى: ىستانبۇلدا تۋىپ وسكەن قازاق قانداسىمىز، ونەر مايتالمانى، ءانشى بەشىر كوسە، مالتەپە ۋنيۆەرسيتەتىنىڭ پروفەسسورى نوعاي تۇركى، دومبىراشى سەدات شولاقۇلى، ىستانبۇلدا مادەني شارالاردى وتكىزۋگە قاتىناساتىن مادەنيەت قايراتكەرى قازاق قىزى انار بايجانوۆا ءادىل باعاسىن بەردى. قاتىناسۋشىلارعا 1 جانە ء2شى ورىندار، باس جۇلدە، 500 اقش دوللارى قاراجاتى، فەستيۆالدىڭ كۋبوكتارى، ەستەلىك، سىيلىقتارى، القالار، مەدالداردى قازىلار القاسىنىڭ مۇشەلەرى، قوعام قايراتكەرى ەرجان ءۋايىس تابىستادى. “فەستيۆالعا قاتىناسۋشى ءار ءبىر جاس بۇلدىرشىندەر، جاس وسپىرىمدەردىڭ بارىدە جەڭىمپاز اتاندى، بارلىعىدا ءبىرىنشى ورىن الدى، ويتكەنى ولار قازاق حالقىنىڭ بي ونەرىن، دومبىراسىن، ۇلتتىق مادەنيەتىمىزدى انادولۋ ەلىنە پاش ەتتى، ءارى قاراي ەۆروپا ەلدەرىنە بارىپ ونەر كورسەتەدى، بارىنە دە ساتتىلىك تىلەيمىز” - دەدى ە.ءۋايىس.
جالپى قازاقستاننىڭ ءار تۇكپىرىنەن كەلگەن 100 دەن استام جاس ونەرپاز ونەر كورسەتتى ولاردىڭ قاسىندا 120 اتا - انالارى بولدى، ياعني 220 قازاقستاندىقتار، جەرگىلىكتى قازاق دياسپوراسىنىڭ وكىلدەرى، ىستانبۇلدا نيدە وبىلىسىنداعى يسميلكوي قازاق قاۋىمداستىعىنىڭ باسشىسى مەحمەت ءالىم، المانيادا كولن قالاسىنداعى قازاق قاۋىمداستىعىنىڭ تەڭ توراعاسى، دومبىراشى، قازاق قانداسىمىز مەحمەت قاسەنتۋ ت.ب وسىندا وقىيتىن قازاق ستۋدەنت جاستارى قاتىستى .
قازاقتىڭ ءان ۇرانى شىرقالىپ، ساحنادا قازاقتىڭ كوك تۋى جەلبىرەدى.
