حالىقارالىق بوكس فەدەراتسياسى - World Boxing الداعى كونگرەسستە وتەتىن سايلاۋعا جىبەرىلگەن ۇمىتكەرلەردىڭ سوڭعى ءتىزىمىن جاريالادى. داۋىس بەرۋ 2025 جىلدىڭ 23 قاراشاسىندا ريم قالاسىندا وتەتىن كونگرەسس وتىرىسى بارىسىندا ۇيىمداستىرىلادى، دەپ حابارلايدى "ادىرنا".
قۇزىرلى ورگان 2025 جىلدىڭ قازان ايىندا تۇسكەن بارلىق ءوتىنىشتى قاراپ، كوميسسيا وڭ قورىتىندى بەرگەن ۇمىتكەرلەردى سايلاۋعا قاتىسۋعا رۇقسات ەتتى.
پرەزيدەنت لاۋازىمىنا جالعىز ۇمىتكەر - گەننادي گولوۆكين. World Boxing جارعىسىنا سايكەس، ەگەر باسشىلىق قىزمەتكە ءبىر عانا ۇمىتكەر ۇسىنىلسا، كونگرەسس ونى بالاماسىز نەگىزدە، ياعني ءبىراۋىزدان ماقۇلدايدى.
پرەزيدەنت سايلاۋىنان بولەك، كۇن تارتىبىنە ۆيتسە-پرەزيدەنت پەن اتقارۋشى كوميتەتتىڭ ەكى مۇشەسىن سايلاۋ ەنگىزىلگەن. تومەندە بەكىتىلگەن ۇمىتكەرلەردىڭ ءتىزىمى بەرىلگەن.
ۆيتسە-پرەزيدەنت لاۋازىمىنا ۇمىتكەرلەر:
- چايۆات چوتيما (تايلاند)
- يشتۆان كوۆاچ (ۆەنگريا)
- رايان و’شي (كانادا)
اتقارۋشى كوميتەتكە ۇمىتكەرلەر:
- مۋلۋد بۋزيان (فرانتسيا)
- نوربەرت كەللەر (بەلگيا)
- يشتۆان كوۆاچ (ۆەنگريا)
- دوناتاس ماچيانسكاس (ليتۆا)
- ميحاەل ميۋللەر (گەرمانيا)
- تاتسۋيا ناكاما (جاپونيا)
- رايان و’شي (كانادا)
كونگرەسس - World Boxing ۇيىمىنىڭ جوعارى باسقارۋ ورگانى. ريمدەگى وتىرىسقا ۆيتسە-پرەزيدەنت دينا گليكيديس توراعالىق ەتەدى. سايلاۋ پروتسەسىن تاۋەلسىز قۇرىلىم قامتاماسىز ەتەدى. سونداي-اق باقىلاۋشىلار قاتىسىپ، بارلىق ءراسىمنىڭ اشىقتىعى مەن رەگلامەنتتىڭ ساقتالۋىن قاداعالايدى.
