يسپانيادا ەكى جۇردەك پويىزدىڭ سوقتىعىسۋى سالدارىنان كەمىندە 50 ادام قازا تاۋىپ، تاعى 179 ادام جاراقات الدى. بۇل تۋرالى Antena 3 جانە ABC باسىلىمدارى جازدى، دەپ حابارلايدى «ادىرنا» ءتىلشىسى.
اپات 28 قازان كۇنى تاڭەرتەڭ مادريدتەن وڭتۇستىككە قاراي ورنالاسقان لوس-ەبەنەس پەن ۋردا مۋنيتسيپاليتەتتەرىنىڭ اراسىندا بولعان. وقيعا ەل استاناسى مەن سەۆيليانى بايلانىستىراتىن نەگىزگى تەمىرجول جەلىسىنىڭ ۋچاسكەسىندە تىركەلگەن. بۇل باعىتتا پويىزدار ساعاتىنا 300–350 شاقىرىم جىلدامدىقپەن قوزعالادى.
الدىن الا مالىمەت بويىنشا، Renfe كومپانياسىنىڭ پويىزى جولدا توقتاپ تۇرعان Iryo كومپانياسىنىڭ پويىزىمەن سوقتىعىسقان. سوقتىعىس سالدارىنان Iryo پويىزىنىڭ ەكى ۆاگونى رەلستەن شىعىپ كەتكەن. ەكى پويىزدا بارلىعى 540-تان استام جولاۋشى بولعان.
يسپانيانىڭ تەمىرجول جەلىسىنىڭ وپەراتورى Adif مادريد – اندالۋسيا جوعارى جىلدامدىقتى تەمىرجول جەلىسىندەگى پويىز قوزعالىسى ەكى باعىتتا دا ۋاقىتشا توقتاتىلعانىن مالىمدەدى.
قازىرگى ۋاقىتتا اپاتتىڭ ءمان-جايى انىقتالىپ جاتىر.
يسپانيانىڭ تەمىرجول ماشينيستەرى كاسىپوداعى Semaf تەمىرجولداعى قاۋىپسىزدىك تالاپتارىنىڭ ساقتالماۋىنا نارازىلىق ءبىلدىرىپ، ەرەۋىل جاريالادى. ەرەۋىل بەيسەنبىگە جوسپارلانعان جانە 24 ساعاتقا سوزىلماق.
بۇل — يسپانيادا بيىل بولعان كەمىندە ءۇشىنشى تەمىرجول وقيعاسى. 18 قاڭتاردا ەلدىڭ وڭتۇستىگىندە ەكى پويىز سوقتىعىسىپ، 39 ادام قازا تاپقان، تاعى ونداعان ادام جاراقات العان بولاتىن. ال 21 قاڭتاردا بارسەلونادان شامامەن 50 شاقىرىم قاشىقتىقتا تاعى ءبىر پويىز رەلستەن شىعىپ كەتكەن. سالدارىنان ءبىر ادام قازا تاۋىپ، 37 ادام جاراقات العان.
