تۇركى الەمىنىڭ رۋحاني استاناسى – تۇركىستان قالاسىندا 25 قازان – رەسپۋبليكا كۇنىنە ارنالعان «قىران ەلىم – قازاقستانىم!» سالتاناتتى ءىس-شاراسى ءوتتى. مەرەكەلىك ءىس-شاراعا قاتىسۋشىلار الدىمەن الاش قايراتكەرلەرىنىڭ وتتى ويلارىن تىڭداپ، ءوڭىر ونەرپازدارىمەن بىرگە قازاقستان رەسپۋبليكاسىنىڭ مەملەكەتتىك ءانۇرانىن شىرقادى.
ماڭىزدى ءىس-شاراعا قاتىسقان تۇركىستان وبلىسىنىڭ اكىمى نۇرالحان كوشەروۆ جۇرتشىلىقتى ايتۋلى مەرەكەمەن قۇتتىقتاپ، ءوڭىردىڭ دامۋىنا ەلەۋلى ۇلەس قوسىپ كەلە جاتقان ءبىر توپ ازاماتتى ماراپاتتادى.
– سىزدەردى رەسپۋبليكا كۇنىمەن شىن جۇرەكتەن قۇتتىقتايمىن! بۇل – حالقىمىزدىڭ سان عاسىرلىق ارمانى ورىندالعان كۇن. 1990 جىلدىڭ 25 قازانىندا قابىلدانعان دەكلاراتسيا – ەلىمىزدىڭ ەركىندىككە جاساعان العاشقى ناقتى قادامى. بۇگىندە ءبىز الەمگە تاۋەلسىز، بەيبىت، ءبىرتۇتاس جانە دامۋشى مەملەكەت رەتىندە تانىلدىق. ەلدىگىمىز انىقتالىپ، شەكارامىز بەلگىلەندى. جارقىن بولاشاققا سەنىممەن قادام باسىپ كەلەمىز. بۇل – بىرلىك پەن پاراساتتىڭ جەڭىسى. ەل پرەزيدەنتى قاسىم-جومارت كەمەلۇلى بيىلعى جولداۋىندا ەل دامۋىنىڭ جاڭا باسىمدىقتارىن ايقىندادى. تسيفرلىق دامۋ، ينۆەستيتسيا تارتۋ، ەكونوميكانى ءارتاراپتاندىرا وتىرىپ، شيكىزاتتىق سەكتوردان تەرەڭ وڭدەۋدى دامىتۋدى تاپسىردى. مەملەكەتتىك باسقارۋ، ءبىلىم بەرۋ مەن دەنساۋلىق ساقتاۋ جۇيەسىن جاساندى ينتەللەكت ارقىلى جاڭعىرتۋدى جۇكتەدى. سونىمەن بىرگە تسيفرلىق تەحنولوگيالاردى اگروونەركاسىپ پەن وڭىرلىك ەكونوميكاعا ەنگىزۋ مىندەتىن دە جۇكتەپ وتىر. وسىعان سايكەس تۇركىستان وبلىسىندا دا ناقتى شارالار قولعا الىندى. ءبىزدىڭ باستى ماقساتىمىز – حالىقتىڭ ءومىر ءسۇرۋ ساپاسى مەن ءال-اۋقاتىن ارتتىرۋ. بۇگىندە تۇركىستان تەك كيەلى شاھار عانا ەمەس، ستراتەگيالىق ماڭىزدى وڭىرگە اينالدى. ءبىزدىڭ الدىمىزدا تۇرعان مىندەت – وسى تاريحي مۇمكىندىكتى تولىق پايدالانىپ، تۇركىستاندى تەك وبلىس ورتالىعى عانا ەمەس، ەل ەكونوميكاسىنا سەرپىن بەرەتىن ايماققا اينالدىرۋ. بۇل ءۇشىن ءبىز بىرلىگىمىزدى بەكەمدەپ، ەلدىك مۇددە جولىندا جۇمىلا ەڭبەك ەتۋىمىز قاجەت. ەلىمىز امان، جۇرتىمىز تىنىش، تۇركىستانىمىز نۇرلى بولسىن! – دەدى نۇرالحان ورالبايۇلى.
سالتاناتتى ءىس-شارادا وبلىس اكىمى نۇرالحان كوشەروۆ ەڭبەگىمەن دارالانعان ەڭبەك ادامدارى مەن مەملەكەتتى دامىتۋعا ۇلەس قوسىپ جۇرگەن قايراتكەر ازاماتتاردى ماراپاتتادى. اتاپ ايتقاندا، «پاراسات»، «قۇرمەت» وردەندەرى مەن «ەرەن ەڭبەگى ءۇشىن»، «شاپاعات» مەدالدارىن تاپسىردى. ماراپاتتالعانداردىڭ قاتارىندا ەڭبەك ارداگەرلەرى، مۇعالىمدەر مەن دارىگەرلەر، مادەنيەت جانە بيزنەس وكىلدەرى، باقتاشىلار مەن ماشينيستەر بار. سونىمەن قاتار سالتاناتتى شارادا وبلىس اكىمى نۇرالحان كوشەروۆ مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقبايدىڭ «مەملەكەتتىك قىزمەت ارداگەرى» توسبەلگىسىمەن ماقتاارال اۋدانىنىڭ اكىمى اسانوۆ باقىت ناسىرحانۇلىن ماراپاتتادى.
مەملەكەت باسشىسى حالىققا بيىلعى جولداۋىندا ينۆەستيتسيا تارتۋ جۇيەسىن جاڭعىرتۋدى تاپسىرعان بولاتىن. وبلىستا قولايلى ينۆەستيتسيالىق كليمات قالىپتاسقان. وبلىس ەكونوميكاسىنىڭ دامۋىنا تىڭ سەرپىن بەرەتىن جالپى قۇنى 2,6 ترلن. تەڭگەنى قۇرايتىن 111 ينۆەستيتسيالىق جوبا پۋلى قالىپتاستى. نەگىزگى باعىتتارى – وڭدەۋ، ەنەرگەتيكا جانە اۋىل شارۋاشىلىعىن تەرەڭ قايتا وڭدەۋ. جوبالاردى تولىق ىسكە اسىرۋ ناتيجەسىندە 24 مىڭعا جۋىق جاڭا جۇمىس ورنى اشىلىپ، بيۋدجەتكە قوسىمشا 100 ملرد. تەڭگە سالىق تۇسەدى. بيىل 332 ملرد. تەڭگەگە 57 جوبانى ىسكە اسىرىپ، 8 174 جۇمىس ورنىن اشۋ جوسپارلانعان. 9 ايدا 33 جوبا ىسكە قوسىلىپ، 4793 جۇمىس ورنى اشىلدى. اتقارىلعان جۇمىستاردىڭ ناتيجەسىندە 9 ايدا ءوڭىر ەكونوميكاسىنا 1 ترلن. تەڭگە ينۆەستيتسيا باعىتتالىپ، 115,9%-عا ءوستى.
مەملەكەت باسشىسى ەل دامۋىنىڭ نەگىزگى سەكتورى – قۋاتتى ونەركاسىپ الەۋەتىنە نەگىزدەلگەن جانە ارتاراپتاندىرىلعان ەكونوميكانى قۇرۋ قاجەتتىلىگىن ايقىنداپ ءوتتى. ءوڭىردىڭ يندۋسترياليزاتسيا الەۋەتىن دامىتۋ ماقساتىندا 20 يندۋستريالدى جانە 3 ارنايى ەكونوميكالىق ايماقتار، شاعىن ونەركاسىپتىك پارك قۇرىلعان. يندۋستريالدىق ايماقتاردا قۇنى 152 ملرد. تەڭگەنى قۇرايتىن 98 ينۆەستيتسيالىق جوبا ىسكە اسىرىلۋدا.
جالپى ونەركاسىپ سالاسىندا اتقارىلعان شارالاردىڭ ەسەبىنەن 9 ايدا 1,1 ترلن. تەڭگەگە ونەركاسىپ ءونىمى ءوندىرىلىپ، ءوسىم 113,5%-عا جەتتى. ءوڭىر ەكونوميكاسىنىڭ ماڭىزدى سالاسى اۋىل شارۋاشىلىعىندا ءونىم 855 ملرد. تەڭگەنى قۇراپ، ءوسىم 101,5% دەڭگەيىندە ورىن الدى.
