تۇركىستان وبلىسى، كەنتاۋ قالاسىنىڭ يندۋستريالىق ايماعىندا جاڭا زاۋىت جۇمىسىن باستادى. ءوندىرىس ورنىنىڭ اشىلۋ سالتاناتىنا تۇركىستان وبلىسىنىڭ اكىمى نۇرالحان كوشەروۆ قاتىسىپ، كوپشىلىكتى قۇتتىقتادى.
– رەسپۋبليكا كۇنى – ەلىمىزدىڭ ەگەمەندىگىن ايشىقتاپ، تاۋەلسىزدىگىمىزدى نىعايتاتىن ماڭىزدى مەرەكە. وسى مەرەيلى مەرەكە قارساڭىندا ونەركاسىپتىك مەتالل قۇرىلىمدارى مەن مەتالل بۇيىمدارىن وندىرەتىن جاڭا كاسىپورىننىڭ اشىلۋىنا كۋا بولىپ وتىرمىز. بۇل – تۇركىستان وبلىسىنىڭ ونەركاسىپتىك الەۋەتىن ارتتىرىپ، ءوڭىر ەكونوميكاسىنا تىڭ سەرپىن بەرەتىن ماڭىزدى جوبا. مەملەكەت باسشىسى قاسىم-جومارت كەمەلۇلى توقاەۆ ايماقتاردا وتاندىق ءوندىرىستى وركەندەتۋگە، ينۆەستيتسيالىق جوبالاردى جۇزەگە اسىرۋعا جانە تۇراقتى جۇمىس ورىندارىن قۇرۋعا ايرىقشا ءمان بەرىپ كەلەدى. وسى باعىتتاعى جۇمىستار وڭىرىمىزدە جۇيەلى تۇردە جالعاسادى، – دەدى وبلىس اكىمى نۇرالحان كوشەروۆ.
«ايدارسترويگرۋپپ» جشس-ءنىڭ زاۋىتىنا 1,5 ملرد تەڭگە ينۆەستيتسيا تارتىلعان. مۇندا 30 جاڭا جۇمىس ورنى قۇرىلدى. كاسىپورىن ونەركاسىپكە ارنالعان مەتالل قۇرىلىمدارى مەن مەتالل بۇيىمدارىن وندىرۋگە ماماندانعان. ءوندىرىس ورنى جىلىنا 100 دانا ءونىم شىعارۋعا قاۋقارلى. جوبانى جۇزەگە اسىرۋ ءۇشىن كەنتاۋ قالاسىنىڭ يندۋستريالىق ايماعىنان «تۇركىستان» الەۋمەتتىك-كاسىپكەرلىك كورپوراتسياسى ارقىلى 1,5 گەكتار جەر ۋچاسكەسى بەرىلگەن. قازىرگى تاڭدا قۇرىلىس-مونتاج جۇمىستارى تولىق اياقتالىپ، نەگىزگى تەحنولوگيالىق جابدىقتار ورناتىلعان.
كاسىپورىندى قاجەتتى ينفراقۇرىلىممەن قامتاماسىز ەتۋ باعىتىندا دا جۇمىستار جۇرگىزىلگەن. ءوندىرىس ورنىنا ەلەكتر جەلىسى تارتىلىپ، ترانسفورماتور ورناتىلعان. سونىمەن قاتار تابيعي گازعا قوسىلۋعا قاجەتتى جۇمىستار اتقارىلعان.
سالتاناتتى راسىمدە وبلىس اكىمى كاسىپورىننىڭ جۇمىسىمەن تانىسىپ، وندىرىستىك ۇدەرىستى كوردى. جاڭا زاۋىتتىڭ ىسكە قوسىلۋى كەنتاۋ قالاسىنىڭ ونەركاسىپتىك الەۋەتىن نىعايتىپ، وڭىردە وتاندىق ءوندىرىستى دامىتۋعا جانە حالىقتى تۇراقتى جۇمىسپەن قامتۋعا ۇلەس قوسادى.
وبلىس اكىمى جۇمىس ساپارىندا كەنتاۋداعى يندۋستريالدى ايماقتى ارالاپ، جاۋاپتىلارعا ءوندىرىس ورىندارىن اشۋ جۇمىسىن كۇشەيتۋدى تاپسىردى. وڭىردە ءوندىرىس ورىندارىن اشۋ جۇمىسى جالعاسادى.
